გასულმა ტურმა ცხრილის ქვედა ნაწილში თითქმის გაარკვია სიტუაცია. „კოლხეთი“ ოფიციალურად დაემშვიდობა ელიტას, „სამტრედიას“ კი პლეი აუტის თამაში მოუწევს ლიგა 2-ის წარმომადგენელთან.
პლეი აუტის მეორე მონაწილე ქვემოქართლურ „სიონსა“ და „რუსთავს“ შორის გაირკვევა. ამ მხრივ, რუსთაველებს თოთქოს უკეთესი შანსი უჩანთ, დარჩენილ ორ ტურში ისინი უკვე უმოტივაციო „სამტრედიასა“ და „ლოკომოტივს“ ეთამაშებიან. მაშინ, როცა „სიონს“ მესამე ადგილის მოცილეებთან – „ტორპედოსა“ და „ჩიხურასთან“ მოუწევს გაჯიბრება.
„რუსთავმა“ ამ ტურში „დილას“ ვერაფერი მოუხერხა და უგოლოდ დაშორდა. თუმცა, რუსთაველებს არბიტრმა გოგა კიკაჩეიშვილმა, თანამსაჯის მითითებით, ნაღდი გოლი არ ჩაუთვალა. ელგუჯა ლობჯანიძემ ბურთი მკერდზე მიიღო და ისე გაიტანა, გოლი კი ხელზე მოხვედრის საბაბით გაუქმდა. ვიდეორეფერი არც ჩვენ გვაწყენდა, მაგრამ ძვირი სიამოვნებააო, ამბობენ.
და კიდევ, ფაქტია, რომ „რუსთავს“ უჭირს მოგება. ამ გუნდს სეზონში ყველაზე მეტი – 13 ფრე აქვს ნათამაშევი.
„საბურთალომ“ ჩემპიონის რანგში პირველი შეხვედრა ჩაატარა და, თითქოს დამთხვევააო – თასის ახლახანმომგებ „ტორპედოსთან.“
მეტოქეებმა ერთმანეთს პატივი სცეს: „ტორპედომ“ „საბურთალოს“ საჩემპიონო დერეფანი მოუწყო. თავის მხრივ, დერეფანი სტუმრებმაც მოაწყეს და „ტორპედოს“ საქართველოს თასის მოგება მიულოცეს.
თამაში უგოლოდ დამთავრდა, თუმცა შედეგზე ამინდმაც იმოქმედა. ქუთაისში ქარიშხალი იყო. საგანგებო სიტუაციების მართვის სამსახურში, იმერეთში გამოძახებების უმრავლესობა (200) ქუთაისიდან დაფიქსირდა. ძლიერმა ქარმა წააქცია 130 ხე, დააზიანა 5 ავტომანქანა და 150 შენობას ახადა სახურავი. გადადო ავიარეისები.
მნიშვნელოვანი ამბავი მოხდა „დინამო არენაზე“. „დინამომ“ „სიონს“ 5:2 მოუგო. დინამოელთა შემტევმა ბუდუ ზივზივაძემ კი მეტოქეს 4 ბურთი გაუტანა და ბომბარდირთა დავაში 21 გოლით დაწინაურდა. საინტერესოა, რომ ეროვნული ჩემპიონატების ისტორიაში პოკერი ყველაზე მეტჯერ (4), თავისი ხანგრძლივი კარიერის განმავლობაში ზურაბ იონანიძეს შეუსრულებია, რომელიც საქართველოში იმერული გუნდების – „ტორპედოს,“ „სამტრედიას,“ „ზესტაფონისა“ და „სამგურალის“ ღირსებას იცავდა.
34-ე ტური: სამტრედია 1:2 ჩიხურა, რუსთავი 0:0 დილა, ლოკომოტივი 5:1 კოლხეთი, დინამო 5:2 სიონი, ტორპედო 0:0 საბურთალო
სატურნირო ცხრილი
| გუნდი | თამაში | მოგება | ფრე | წაგება | ბურთები | ქულა |
|---|---|---|---|---|---|---|
| საბურთალო | 36 | 24 | 7 | 5 | 64:29 | 79 |
| დინამო | 36 | 21 | 6 | 9 | 73:38 | 69 |
| ტორპედო | 36 | 20 | 9 | 7 | 66:25 | 69 |
| ჩიხურა | 36 | 19 | 7 | 10 | 54:33 | 64 |
| დილა | 36 | 17 | 12 | 7 | 60:40 | 63 |
| ლოკომოტივი | 36 | 12 | 8 | 16 | 43:55 | 44 |
| რუსთავი | 36 | 8 | 13 | 15 | 33:44 | 37 |
| სიონი | 36 | 8 | 7 | 21 | 39:65 | 31 |
| სამტრედია | 36 | 4 | 9 | 23 | 28:81 | 21 |
| კოლხეთი | 36 | 4 | 8 | 24 | 26:76 | 14 |
კოლხეთს დაკლებული აქვს 6 ქულა
35-ე ტური
3 დეკემბერი: რუსთავი – სამტრედია
4 დეკემბერი: კოლხეთი – დინამო, სიონი – ტორპედო, დილა – ლოკომოტივი, საბურთალო – ჩიხურა
მეგოლეები: ბუდუ ზივზივაძე (დინამო) – 21, გიორგი გაბედავა (ჩიხურა) – 20, მიკოლა კოვტალიუკი (დილა) – 18, ლეანდრო რიბეირო (დილა), თორნიკე კაპანაძე (ტორპედო) – 14, მამია გავაშელიშვილი (ლოკომოტივი), ვაგნერ გონსალვეში (საბურთალო), ოთარ კიტეიშვილი (დინამო/ შტურმი ავსტრია) – 11
