„სანის” ცნობით „რეალი” მარკუს რეშფორდისა და კრისტიან ერიკსენის შესაძენად ინგლისურ ბაზარზე აპირებს გასვლას. მადრიდელები 90 მილიონი გირვანქით ანუ 101 მილიონი ევროთი ყოფილან შეიარაღებულნი.
გაზეთის ცნობით „რეალის” შეფებს ინგლისისა და ხორვატიის ნაკრებების შეხვედრა უნახავთ და რეშფორდის თამაში მოსწონებიათ. მათ იმედი აქვთ, რომ „მანჩესტერ იუნაიტედის” ფეხბურთელი „სანტიაგო ბერნაბეუდან” კრიშტიანუ რონალდუს წასვლის შემდეგ დარჩენილი სიცარიელის ნაწილს მაინც შეავსებს.
და როგორც ზემოთ მოგახსენეთ, „რეალს” „ტოტენჰემ ჰოთსპურის” დანიელი ვარსკვლავის კრისტიან ერიკსენის გადაბირებაც სურს. ადვილი მისახვედრია, რომ 26 წლის ერიკსენი „ლოს ბლანკოსს” 33 წლის მოდრიჩის შესაცვლელად სჭირდება.
ზემოხსენებული რეშფორდი კი 21 წლისაა და „მანჩესტერ იუნაიტედში” მაინცდამაინც ვეღარ ბრწყინავს. ჟოზე მოურინიუმ მიმდინარე სეზონში ის სასტარტო შემადგენლობაში მხოლოდ ხუთჯერ ათამაშა. მადრიდელთა ახალი მწვრთნელი სანტიაგო სოლარი კი ინგლისელი თავდამსხმელის დიდი გულშემატკივარი ყოფილა და მის საყიდლად თურმე 50 მილიონი გირვანქა ანუ 56 მილიონი ევრო არ ენანება.
საინტერესოა, რომ როდესაც ბოლო შეხვედრებში „მანჩესტერ იუნაიტედის” თამაშებზე „რეალის” სკაუტებს მოჰკრეს თვალი ეგონათ, რომ ისინი პოლ პოგბასა და რომელუ ლუკაკუს აკვირდებოდნენ. ახლა „სანი” ამტკიცებს, რომ რეშფორდმა ხორვატებთან შეხვედრის წინ კარგად იცოდა, რომ მადრიდელები ტრიბუნებზე მის სანახავად იყვნენ მისულები.
რაც შეეხება ერიკსენს, მას კონტრაქტის თანახმად „ტოტენჰემ ჰოთსპურთან” კიდევ 18 თვე აკავშირებს, მაგრამ უკმაყოფილოა, რადგან მის თანაგუნდელ დელე ალის „დეზებმა” ხელფასი კვირაში 150 ათას გირვანქამდე გაუზარდეს და ახლა თავადაც პირობების გადახედვას ითხოვს.
კრისტიან ერიკსენი „ტოტენჰემ ჰოთსპურმა” „აიაქსისგან” 2013 წელს 11,5 მილიონ გირვანქად იყიდა.
