საფრანგეთის ნაკრების მწვრთნელმა დიდიე დეშამმა პრეს-კონფერენციაზე ოსმან დემბელეს დაგვიანებებზე ილაპარაკა — მოგეხსენებათ, დემბელეს რეგულარული დაგვიანება მის კლუბში, „ბარსელონაში”, უკვე პრობლემად იქცა.
„კარგად ვიცი ყოველი დაგვიანების შემდეგ როგორც იმართლებს ხოლმე ოსმანი თავს, — თქვა მსოფლიოს ჩემპიონთა თავკაცმა, — როდესაც შენიშვნას აძლევ, ის გპასუხობს: კი მაგრამ, მარტო მე ხომ არ ვიგვიანებ.
სამწუხაროდ, დემბელეს ეს ცუდი ჩვევა სისხლში აქვს გამჯდარი. არადა, როგორც კლუბში, ასევე ნაკრებში, ის უფრო ყურადღებით უნდა მოეკიდოს ისეთ წვრილმანებს რომლებიც უმაღლეს დონეზე მოთამაშე პროფესიონალი ფეხბურთელისთვის ძალიან მნიშვნელოვანია.
ოსმანი ჯერ ახალგაზრდაა და მე არ ვკარგავ იმედს, რომ ის ყველაფერს მიხვდება. ჯერჯერობით კი სულ ერთი და იგივე მეორდება, მაგრამ რაც უფრო მალე შეცვლის ის თავის ყოფა-ქცევას, მით უკეთესი იქნება ყველასთვის”.
ჟურნალისტებმა დეშამს ჰკითხეს, ჰქონდა თუ არა მას კავშირი „ბარსელონას” მწვრთნელ ერნესტო ვალვერდესთან დემბელეს საკითხთან დაკავშირებით.
„მე ჩემი ფეხბურთელების კლუბების ყოველდღიურ ცხოვრებაში არ ვერევი, — მიუგო დეშამმა, რომელსაც მსოფლიოს ჩემპიონის ტიტული მოპოვებული აქვს არა მხოლოდ მწვრთნელის, არამედ ფეხბურთელის რანგშიც, — როგორ მოამზადებენ თავიანთ მოთამაშეს, მათი საქმეა”.
ხოლო „ბარსელონასთვის” დემბელეს დაგვიანებები რეალურ პრობლემად რომ იქცა ჟერარდ პიკეს განცხადებიდანაც კარგად ჩანს. „ბარსას” ვეტერანმა შინ, „ბეტისთან” 3:4 დამარცხების შემდეგ თქვა: „ჩვენ ახლავე უნდა ვუშველოთ ამ ბიჭს, რათა ფეხბურთი მისთვის სადღეღამისო საქმედ იქცეს”.
საქმე კი ის გახლავთ, რომ დემბელე ვალვერდემ „ბეტისთან” მატჩის განაცხადში არ შეიყვანა. პასუხად, ფრანგი სტადიონზე თამაშის დაწყებამდე 5 წუთით ადრე მივიდა და შესვენების შემდეგაც ოთხი წუთის დაგვიანებით დაბრუნდა თავის ადგილზე.
