პრეს-კონფერენცია, რომელსაც „ბაიერნის” ოფისში დღეს დიდი მღელვარებით ელოდნენ, ჩატარდა, მაგრამ მოლოდინი გააწბილა.
თავიდან ის ვთქვათ, რატომ ელოდნენ ბავარიელთა შეფების ამ პრეს-კონფერენციას მოუთმენლად. იმიტომ, რომ ბოლო დღეებში ინტენსიურად ალაპარაკდნენ „რეკორდმაისტერში” არსენ ვენგერის შესაძლო დანიშვნის შესახებ. იყო მოლოდინი, რომ პრეს-კონფერენციაზე იანვრიდან ნიკო კოვაჩის არსენ ვენგერით შეცვლის ამბავს გამოაცხადებდნენ. შემდეგ ეს მოლოდინი გაძლიერდა, რადგან ითქვა, ჟურნალისტებს ული ჰიონესი, კარლ-ჰაინც რუმენიგე და ჰასან სალიჰამიჯიჩი შეხვდებიანო, ეს ტრიო კი ერთად ხშირად არ გამოდის. ბოლოს მათ ერთ წელიწადზე მეტი ხნის წინ „ბაიერნის” თავკაცად ული ჰიონესის დანიშვნა ამცნეს საზოგადოებას და შეიქმნა შთაბეჭდილება, რომ თუკი პრეს-კონფერენციას ხსენებული ტრიო მართავს, ესე იგი ძველი თავი გაგორდება და ახალი დაინიშნება.
ამის ნაცვლად, „ბაიერნის” პრეზიდენტმა, მენეჯერმა და სპორტულმა დირექტორმა ძირითადად ჟურნალისტებთან იკამათეს და საკმაოდ მკაცრი, პერიოდულად კი უხეში გამოთქმების გამოყენებით დაიცვეს თავიანთი ფეხბურთელები და პოზიციები.
გერმანულ პრესაში პრეს-კონფერენციის ჩანაწერები დეტალურად გამოქვეყნდა, მაგრამ აქ დიდი ტექსტის მოტანა მოსაბეზრებლად მიგვაჩნია და ამიტომ ორიოდ მაგალითს მოვიყვანთ.
ული ჰიონესი: „როდესაც გაზაფხულზე, ჩემპიონთა ლიგის მეოთხედფინალში სევილიაში ვთამაშობდით, ხუან ბერნატმა ისე საშინლად ითამაშა, რომ კინაღამ გააგდებინა ჩვენი გუნდი. თუ გავვარდებოდით, ეს პირადად მისი ბრალი იქნებოდა. სწორედ მაშინ გადავწყვიტე, რომ ეს ფეხბურთელი თავიდან უნდა მოგვეშორებინა, თქვენგან კი ველოდი, რომ დაწერდით, ბერნატის თამაში ნამდვილ მძ…რს ჰგავდაო”.
იგივე ჰიონესი მესუთ იოზილის შესახებ: „იოზილის თამაში გერმანიის ნაკრებში წლების განმავლობაში ჭუჭყი და ნაგავი იყო”.
სამაგიეროდ, „ბაიერნის” შეფების დამოკიდებულება მათი ფავორიტი ფეხბურთელებისადმი სრულიად განსხვავებული გახლდათ.
კარლ-ჰაინც რუმენიგე: „რასაკვირველია, ჰოლანდიის ნაკრებთან ის შეცდა, მაგრამ განა ამის გამო კაცის თავზე გადავლა შეიძლება? მთავარი ღირსებაა.”
ჰიონესი: „მანუელი კარგა ხანს დაშავებული იყო, ტრავმის გამო კი ფეხბურთელები თავის რწმენას კარგავენ”.
ზოგადად, პრეს-კონფერენციას ეტყობოდა, რომ ის გერმანულ მედიაში ბუნდესნაკრების ჰოლანდიასთან 0:3 მარცხის შემდეგ მოძალებული კრიტიკის პასუხი იყო. როგორც ჩანს, გერმანელი ჟურნალისტების მწარე კომენტარები „ბაიერნის” მოთამაშეებს დიდად შეეხო.
