შანხაის მასტერსის ფინალში სერბმა ნოვაკ ჯოკოვიჩმა ხორვატ ბორნა ჩორიჩს 6:3, 6:4 მოუგო. დიდი ამბავიო, იტყვის ჩოგბურთში ისე რა ჩახედული მკითხველი, მაგრამ სტატიას თუ ჩაიკითხავთ ოვაციები ფეხზე წამოდგომის გარეშეც შეგიძლიათ გაუმართოთ სერბ ტერმინატორს.
პირველი: ბორნა ჩორიჩი ვინმე არიფი არ გეგონოთ. ფინალამდე ვავრინკას, დელ პოტროს და ფედერერს გამოუყვანა წირვა 21 წლის ბიჭმა.
მეორე: ჯოკოვიჩმა ასეთ მეტოქესთან პირველი მოწოდების 90 და მეორე მოწოდების 70% მოიგო. კოსმიური შედეგია!
მესამე: მთელი ტურნირის მანძილზე მეტოქეებს 5 მატჩში ოდენ 4 ბრეიკ-პოინტი ჰქონდათ და ნოვაკმა არც ერთი არ დათმო! ამგვარი რამ აქამდე მხოლოდ ფედერერს ცინცინატის (2012, 2015) და ზვერევს მადრიდის (2018) მასტერსებზე მოეხერხებინათ.
მეოთხე: ჯოკოვიჩს ჩინეთში უფრო მეტი ტიტული აქვს მოგებული, ვიდრე მარცხი აქვს ნაწვნევი – 11:9. მასტერსებზე 65-დან 61 მატჩი აქვს მოგებული.
მეხუთე: მიმდინარე სეზონის მეორე ნახევარში სერბმა 28 შეხვედრიდან 27-ში იმარჯვა, ჯამში 4 ტურნირი მოიგო და აქედან 2 დიდი სლემის იყო.
… ეს ის კაცია, ორი წელი იდაყვის ტრავმის გამო რომ გამოტოვა და ბევრმა ჩამოწერა. ნოვაკი დღეს ისეთივე მონსტრია, როგორიც 2012-2015 წლებში იყო.
შანხაის ტურნირის შემდეგ მან ფედერერი უკან მოიტოვა, რეიტინგში მეორეა და რაფა ნადალს 215 ქულითღა ჩამორჩება.
ჯოკოვიჩს საკუთარი მანერა აქვს. არ მსახიობობს, არადა, მიმბაძველი ბევრი ჰყავს. მათ შორის ენდი მარი და ბოლო მსხვერპლი ბორნა ჩორიჩი. სწორედ ამიტომაც არიან უშანსოდ.
ჯოკოვიჩს, რომელიც სწორუპოვარია ბურთის მიღებისას, მისივე იარაღით არ უნდა ეომო. თავს უფლებას მივცემ და ვიტყვი, რომ მის გარდა დღეს საკუთარ ჩოგბურთს მხოლოდ რაფა ნადალი და როჯერ ფედერერი თამაშობენ. მათ ჯერ კიდევ აქვთ შანსი.
დანარჩენებო: ძრწოდეთ, მეფე დაბრუნდა!
