„მანჩესტერ იუნაიტედის”, უფრო სწორად კი ჟოზე მოურინიუს ამბავი უკვე სერიალის სახეს იღებს. კვლავ გრძელდება მითქმა-მოთქმა, რომ მის ნაცვლად კლუბის ხელმძღვანელობა ზინედინ ზიდანის მიყვანას აპირებს, პორტუგალიელი კი შეფებთან იანვრის სატრასფერო ფულზე აპირებს ლაპარაკს.
მოკლედ, ასეა: ხუთშაბათს „მანჩესტერ იუნაიტედის” ოფისში დირექტორატის შეხვედრაა დანიშნული, მანამდე კი მოურინიუ აღმასრულებელ ვიცე-თავმჯდომარეს ედ ვუდვორდს უნდა შეხვდეს. ამბობენ, შეხვედრა სადმე ლონდონში გაიმართებაო.
„განსაკუთრებული” გულუბრყვილო კაცი არ არის და ხვდება, რომ დირექტორატი მის შემცვლელს ეძებს, თუმცა თუ ვუდვორდი ეტყვის, რომ მას ხელს არავინ ახლებს, მაშინ ის იანვრის ტრანსფერებზე გადაუტანს ლაპარაკს. მწვრთნელს აინტერესებს, რამდენ ფულს გაიმეტებს კლუბი, რათა მან, ბოლოს და ბოლოს, ცენტრალური მცველი და გარემარბი იყიდოს. მოგეხსენებათ, ზაფხულში მოურინიუ ვუდვორდმა გაწბილებული დატოვა.
მეორე მხრივ, რაც პორტუგალიელი „მანჩესტერ იუნაიტედს” სათავეში უდგას, კლუბმა მას 350 მილიონი გირვანქა მისცა და მერე აღმოაჩინა, რომ ისეთი ფეხბურთელები, როგორებიც არიან ერიკ ბეიი და ვიქტორ ლინდელოფი, ჩაფლავდნენ.
ახლა ამბობენ, რომ გასულ შაბათს, „ნიუკასლთან” შეხვედრის წინ მოურინიუმ მესიჯი მიიღო, სადაც ეწერა, მას-მედიაში გავრცელებულ ხმებს, თითქოს კლუბი შენ მოხსნას აპირებს, ყურადღებას ნუ მიაქცევო. სავარაუდოდ, ეს მესიჯი მწვრთნელს თავად ვუდვორდმა გაუგზავნა.
შემდეგ რაც მოხდა მოგეხსენებათ: „ნიუკასლი” მანჩესტერელებს პირველ ტაიმში 2:0-ს უგებდა, მაგრამ მეორე ნახევარში ყველაფერი შეიცვალა და მოურინიუს გუნდმა 3:2 გაიმარჯვა. ცხადია, ასეთი ეფექტური ქამბექის შემდეგ მოურინიუს მოხსნაზე ლაპარაკი ცოტა ხნით მაინც გადაიდო.
მოურინიუსთვის კარგის ნიშანი უნდა იყოს ისიც, რომ „ნიუკასლთან” შეხვედრაში მას მხარში ამოუდგა თითქოსდა დანასისხლად გადაკიდებული პოლ პოგბაც. მან თავი გამოიჩინა არა მხოლოდ როგორც ფეხბურთელმა, არამედ შესვენებისას ტაქტიკის განსაზღვრაშიც კი მიიღო მონაწილეობა.
