შერეული ორთაბრძოლები სანახაობრივი სპორტია, UFC კი ყოველ ჯერზე ამ სანახაობას ფულის საჭრელ დაზგად გადააქცევს ხოლმე.
ასე იყო 7 ოქტომბრის დილასაც, როცა ამერიკული ვას ვეგასში რინგზე მოქმედი ჩემპიონი ჰაბიბ ნურმაგომედოვი და ყოფილი ჩემპიონი კონორ მაკგრეგორი გავიდნენ. სატიტულო ბრძოლები სპორტის ამ სახეობაში ხუთრაუნდიანია, მაგრამ ოღრაში ბუკმეკერები დარწმუნებულნი იყვნენ, რომ ვადამდე დასრულდებოდა…
დანარჩენს კი უკეთ საქართველოს შიდოკანის ფედერაციის პრეზიდენტი, მსოფლიოს ჩემპიონი, მსოფლიოსა და ევროპის პრიზიორი იოსებ კობერიძე გვეტყვის:
– იოსებ, ვის ქომაგობდი და რამდენად გამართლდა შენი პროგნოზი?
– ჰაბიბს რომ ვქომაგობდი, არ დამიმალავს. ჯერ ერთი დაღესტანელი ბიჭია, კავკასიელი და ამიტომ. მეორეც, ზაფხულშივე ვწერდი სოციალურ ქსელში, რომ ნურმაგომედოვი ამ სპორტში პირველი ნომერია.
– წინასამატჩო პრესკონფერენციებმა და ინტერვიუებმა ურთიერთლანძღვის ფონზე ჩაიარა. რამდენად იქონია ამან გავლენა უშუალოდ ბრძოლაზე?
– მაყურებლების გახურება და ინტრიგის გაზრდა ჩვეულებრივი მომენტია, მაგრამ მაკგრეგორი ოჯახის, მშობლების და ზოგადად დაღესტნელების ლანძღვაზე გადავიდა, რაც ნებისმიერ შემთხვევაში უკადრისი საქციელია. შესაძლოა ეს მომენტი დაღესტანელისთვის დამატებით მოტივაციადაც იქცა.
– სტილი ცოტა განსხვავებული აქვთ…
– მაკგრეგორს დგომში ჩხუბი უყვარს, ჰაბიბს კი საჭიდაო სკოლა აქვს გავლილი და პარტერში ბრძოლა მისი სტიქიაა. მის ვადამდელ მოგებას ველოდი. მეორეში დაღესტანელმა ზურგზე დააგდო და დარტყმების კარგი სერიაც შეასრულა. გონგს რომ არ მოესწრო, ალბათ, მანდ დასრულდებოდა ყველაფერი.
– მაგრამ მეოთხე რაუნდში გონგამდე ვეღარ მივიდა ირლანდიელი…
– უპატიებელი შეცდომა დაუშვა, როცა პარტერში მეტოქეს „ზურგი მისცა“. ჰაბიბის დონის მებრძოლები ასეთ რამეს არ პატიობენ და მანაც მყისიერად მოგუდა.
– კონორმა უკვე მოითხოვა რევანში, არადა ტრავმა რომ არ მიეღო, გაზაფხულზე ფერგიუსონს უნდა ეჩხუბა ჰაბიბთან. ახლა ისიც ფორმაშია და სატიტულო ბრძოლას ითხოვს. ვის აირჩევს ჰაბიბი?
– არჩევანს ალბათ ჰონორარის მიხედვით გააკეთებს. UFC არწმუნებს კონორს და შესაძლოა, რევანშის შანსი მისცენ კიდეც. ახლა ბურთი ჰაბიბის მოედანზეა და ივაჭრებს. გუშინდელ ბრძოლაში დამარცხებულმა მეტი მიიღო, რაც ჩემპიონის ბანაკს უსამართლოდ მიაჩნია. დღევანდელი გადასახედიდან, ვინც არ უნდა დაუყენონ, თუ ჰაბიბი ფორმაში იქნა, ქამარს არავის დაუთმობს.
