დავიწყოთ, ლეროი სანეთი, რომელზეც ამბობენ, „იუვენტუსის” პატრონ ანდრეა ანიელის ძალიან მოსწონს და კრიშტიანუ რონალდუს ყიდვით ჯიბეშეთხელებული ფინანსურად წელში რომ გასწორდება, მის გადაბირებას შეეცდებაო. ეს ცნობა „კალჩომერკატომ” გაავრცელა.
გერმანელი 22 წლისაა. ბოლო დროს, აქა-იქ დაიწერა, რომ მას „მანჩესტერ სიტის” თავკაც პეპ გვარდიოლასთან ურთიერთობა ცოტა გაუფუჭდა და როგორც ჩანს „ბებერი ქალბატონი” სწორედ ამით აპირებს სარგებლობას.
თუმცა, აქ ერთხელაც უნდა გავიმეოროთ ის, რაც ზემოთ ვთქვით: რონალდუში100 მილიონი ევროს (პლუს ვარსკვლავის ბავშვობისდროინდელი კლუბებისთვის საკომპენსაციო თანხებისა და ზედაც 12 მილიონი სხვა ფულის) გადახდის შემდეგ ტურინული კლუბი ქესეტად არის და სანეს ყიდვას ანუ, სავარაუდოდ 150 მილიონი ევროს გადახდას ჯერჯერობით ვერ შეძლებს. ორ წელიწადში სხვა სურათი იქნებაო, დაწერა გამოცემამ, მაგრამ ორი წელიწადი დიდი დროა. მოახერხებს ანიელი რამეს უახლოეს მომავალში? — საკითხავი აი, რა არის.
ამასობაში „ჰერტას” ნახევარმცველ არნე მაიერს, რომელსაც ახალ კროოსს უწოდებენ, ნახევარმა ევროპამ დაადგა თვალი. 19 წლის ფეხბურთელის შეძენით დაინტერესებულები არიან ზემოთხსენებული „იუვენტუსი”, „მანჩესტერ იუნაიტედი” და „არსენალი”.
„მირორი” წერს, რომ ლონდონელებმა და მანჩესტერელებმა ბერლინში უკვე აფრინეს სკაუტები და ყმაწვილს, რომელიც „ჰერტამ” ახალ სეზონში ბუნდესლიგის ოთხივე ტურში თავიდან ბოლომდე ათამაშა, კბილები ახლოდან დაკვირვებით გაუსინჯეს. არნე მაიერს ბერლინელებთან 2020 წლამდე აქვთ კონტრაქტი.
