აზერბაიჯანის დედაქალაქში დაწყებულ მსოფლიოს პირველობას იმედთან ერთად გარკვეული სიფრთხილითაც ველოდით.
ბოლო პერიოდში ჩვენ ძიუდოში მთლად კარგად ვერაა საქმეები, მაგრამ ბაქოური სტარტი ურიგო არ გამოდგა.
60 კილოგრამამდე წონით კატეგორიაში ამირან პაპინასშვილმა მალაველი ნდამუს, ბულგარელი გერჩიევის, მასპინძელი საფაროვის და ბრაზილიელი ტაკაბაცაკეს ბარიერები ისე დაძლია, ოქროს მედლისთვისაც კი შევემზადეთ.
სამწუხაროდ, ნახევარფინალური ბარიერი ამირანისთვის დაუძლეველი აღმოჩნდა. რუსეთის სახელით მოასპარეზე რობერტ მშვიდობაძემ პაპინაშვილს სძლია და იმედად ბრინჯაო დაგვიტოვა. არადა ფინალი ძალიან ახლოს იყო, მშვიდობაძემ პაპინაშვილს სულ ბოლო წამს გაუთანაბრა და დამატებით დროში „ოქროს ილეთით“ აჯობა. მესამე ადგილისთვის ბოძებული შანსი კი ჩვენებურმა აღარ გაანიავა და კიდევ ერთი მასპინძლის – ჰუსეინოვის ძლევით მსოფლიოს მედალოსანი შეიქნა.
მეორე ქართველმა ლუხუმ ჩხვიმიანმა ბულგარელი ალიაჩევი კი დააიპონა, მაგრამ მერე იაპონელ ნაგაიამას ვერაფერი მოუხერხა და ტურნირს ნაადრევად გამოეთიშა.
სტარტი ურიგო არ არის და ვულოცავთ ამირანს, ჩვენი სხვა ბიჭებისაც არანაკლები გვეიმედება.
