არისტოკრატთა ახალი დამრიგებელი, მაურიციო სარი მიიჩნევს, რომ ედენ აზარს შეუძლია მსოფლიოს საუკეთესო ფეხბურთელი გახდეს.
ბოლო წლებია აზარი „ჩელსის“ შეუცვლელი ლიდერია. გასულ მსოფლიო ჩემპიონატზე კი ლომის წილი დაიდო ბელგიის ნაკრების მიერ ბრინჯაოს მედლების მოპოვების საქმეში. სწორედ ამ დროს დაიწყო მისი მადრიდის „რეალში“ გადასვლის შესახებ საუბარი.
სარი არ მალავს, რომ ერთობ წუხდა ამ ამბის გამო. „ცხადია, ვნერვიულობდი. თუმცა მასთან პირველივე საუბრის შემდეგ მივხვდი, რომ არსად წავიდოდა. დაახლოებით 20 დღე გაურკვევლობაში ვიყავით. ხუმრობა ხომ არ არის, ცოტა ფიზიკურად რომ მომძლავრდეს, მისი ბადალი მოთამაშე ევროპაში არ იქნება. და როგორია ასეთი ფეხბურთელის დაკარგვა – ამბობს სარი, – შემდეგ კიდევ რანდენჯერმე ვისაუბრეთ და კრინტი არ დაუძრავს წასვლის შესახებ. ამიტომ, დავრწმუნდი, რომ აზარი „რეალში“ არ წავა. რატომ დავრწმუნდი? იმიტომ, რომ „ჩელსი“ ერთ-ერთი მნიშვნელოვანი კლუბია ევროპაში და ედენი ამ გუნდის ერთ-ერთი უმნიშვნელოვანესი ფეხბურთელი.“
სარის წინამორბედ ანტონიო კონტეს მიაჩნდა, რომ სეზონის განმავლობაში აზარს მეტი გოლი უნდა გაეტანა, რათა ოქროს ბურთისთვის დავაში კრიშტიანუ რონალდუსა და ლიონელ მესის გატოლებოდა.
„საქმე ისაა, რომ კრიშტიანუ და მესი უფრო მეტად ასრულებდნენ თავდამსხმელის ფუნქციებს, აგრძელებს სარი, – აზარიც გვევლინებოდა ხოლმე მარცხენა შემტევის ადგილზე, მაგრამ უფრო ხშირად მოედნის სიღრმიდან უწევდა კომბინაციის დაწყება, ამიტომ გოლებიც ნაკლები გაჰქონდა. არადა, შეუძლია მსოფლიოში პირველი გახდეს. ყველაფერი მასზეა დამოკიდებული.“
და აი, შაბათს, „არსენალთან“ 3:2 მოგებული შეხვედრის შემდეგ, აზარმა ჟურნალისტებს უთხრა, რომ ამ სეზონში „ჩელსიში“ დარჩება, თუმცა ხანგრძლივ კონტრაქტზე უარს ამბობს: „ყველას ახსოვს რაც ვთქვი მსოფლიო ჩემპიონატის შემდეგ, მაგრამ ახლა ლონდონში ყოფნით ბედნიერი ვარ. „ჩელსისთან“ კიდევ ორწლიანი კონტრაქტი მაკავშირებს და ვნახოთ რა მოხდება. წლეულს არსად მივდივარ.“
ინგლისური ტაბლოიდები კი წერენ, რომ არისტოკრატთა მამები ფიქრობენ და გამორიცხული არ არის, აზარს ახალი ხელშეკრულება შესთავაზონ, რომლის მიხედვითაც ბელგიელი კვირაში გასამრჯელოდ 300 ათას გირვანქას მიიღებსო.
რაც შეეხება „ჩელსის“ წლევანდელ შანსებს. ლურჯებმა ახალი სეზონის ორივე მატჩი მოიგეს, „ჰადერსფილდთან“ 3:0 და „არსენალთან“ 3:2. სარი კი ამბობს, რომ დღეს პრემიერლიგაში არის მხოლოდ ერთი გუნდი, რომელიც სხვებს აღემატება და ეს პეპ გვარდიოლას სიტია. ამიტომ, წარმატების მისაღწევად 101 პროცენტითაა დახარჯვა საჭიროო.
