მორიგ საკონტროლო შეხვედრაში „ბაიერნმა” „მანჩესტერ იუნაიტედს” 1:0 მოუგო. ინგლისური პრესა წერს, რომ „წითელმა ეშმაკებმა” საშინლად მოსაწყენი ფეხბურთი ითამაშეს. მატჩის ერთადერთი გოლი მეორე ტაიმის დასაწყისში ხავი მარტინესმა გაიტანა და… „იუნაიტედმა” ბავარიელებს მათთვის ჯერომ ბოატენგის მიყიდვა შესთავაზა — მოგეხსენებათ, ინგლისის ოცგზის ჩემპიონს ცენტრალური მცველი სჭირდება. ბოატენგმა „იუნაიტედთან” მეორე ტაიმში ითამაშა.
პრემიერლიგაში სატრანსფერო სეზონი დანარჩენი ევროპისგან განსხვავებით სამ დღეში იხურება და ჟოზე მოურინიუმ მაღალი დონის მოთამაშის ყიდვა სწრაფად უნდა შეძლოს.
შეგახსენებთ, რომ „განსაკუთრებულს” აქამდე ლესტერელი ჰარი მაგუაირის, ბარსელონელი იერი მინასა და ტოტენჰემელი ტობი ალდერვეირელდის შეძენა უნდოდა, მაგრამ გეგმები ჩაეშალა. გერმანული „ბილდის” თქმით ახლა პორტუგალიელმა „ბაიერნს” მიმართა, რათა „მანჩესტერ სიტის” ყოფილი მცველი შეიძინოს. ამბობენ, რომ რეკორდმაისტერი ბოატენგში 45 მილიონ გირვანქას ითხოვს.
29 წლის ბოატენგი ბოლო წლებში ხშირად იყო დაშავებული, რის გამოც როგორც კლუბში ასევე ნაკრებში დამკვიდრება უჭირდა. იოაჰიმ ლიოვს ის ამ ზაფხულს, მსოფლიოს ჩემპიონატზე წაყვანილი ჰყავდა. განელი კევინ-პრინს ბოატენგის ნახევარძმამ შვედეთთან შეხვედრაში ორი ყვითელი ბარათი მიიღო და მოედანი დატოვა. ის გახდა 2010 წლის მერე გერმანიის ნაკრების პირველი ფეხბურთელი, რომელიც მსოფლიოს ჩემპიონატის შეხვედრაში მოედნიდან გააძევეს. რვა წლის წინ, სერბეთთან მსაჯმა მიროსლავ კლოზე გააძევა.
ბოატენგი „მანჩესტერ სიტიდან” „ბაიერნში” 2011 წელს გადავიდა და მას მერე ექვსჯერ გახდა ბუნდესლიგის ჩემპიონი, ხოლო ერთხელ ჩემპიონთა ლიგის მფლობელი.
