ცოდვას ვერ ვიტყვი, ვიკიპედიაში ან სხვა წყაროებში არ მიქექია, რომ უფრო მყვირალა ისტორია მეპოვა.
არც სურვილი მქონდა და, სავარაუდოდ, ვერც ვიპოვიდი: 39 წლის პერუელმა კლაუდიო პიზარომ ბრემენის ვერდერთან კარიერაში მეოთხე (!) კონტრაქტი გააფორმა.
ძნელი სათქმელია, რაში მდგომარეობს საიდუმლო, ან ასეთი სიყვარულის პირობებში რაღა საჭირო იყო სამგზის განშორება, მაგრამ ფაქტია: როგორც კი კარიერაში რთული პერიოდი დაუდგებოდა, პიზარო ბრემენში ბრუნდებოდა და ყველაფერი თავის ადგილას დგებოდა.
19 წლის პერუელი „ვერდერში“ 1999 წელს გამოჩნდა, სადებიუტო მატჩში „კაიზრსლაუტერნს“ გაუტანა, რამდენიმე დღეში კი „ვოლფსბურგთან“ ჰეთ-თრიქი მიითვალა. ორ სეზონში გატანილი 34 გოლის შემდეგ კლაუდიო პიზარომ „ბაიერნის“ ფორმა მოირგო და ექვსი დიდებული სეზონიც ჩაატარა.
პიზარო დაფრინავდა – 71 გოლი 174 შეხვედრაში და 7 ტიტული. ამის მიუხედავად, როცა ხელფასის 4 მილიონ ევრომდე გაზრდა მოითხოვა, რუმენიგემ უკმეხად უპასუხა: „ვისაც შევჩენკოს ხელფასი უნდა, მოედანზე შევჩენკოზე ნაკლები არ უნდა იყოს“… და კლაუდიო პიზაროც „ჩელსიში“ აღმოჩნდა.
ჟოზე მოურინიუ ბოლომდე ენდობოდა, მაგრამ არაფერი გამოსდიოდა, სეუ ჟოზეს ნაცვლად მისულმა გრანტმა კი სულაც დუბლებში გაამწესა. ინგლისში ორწლიანი ჯახირის შემდეგ პიზარო იჯარით „ვერდერში“ დაბრუნდა და აღმაფრენაც დაიბრუნა. ორ სეზონში 33 გოლი და.. ისევ „ბაიერნი“.
ოფიციალურად ჩემპიონთა ლიგის გამარჯვებული კი გახდა, მაგრამ მანჯუკიჩის და გომესის ჩრდილში მოქცეული სათადარიგოთა სკამს გაუშინარდა. და სად წავიდოდა ნირწამხდარი პერუელი, თუ არა „ვერდერში“? ამ კლუბში ყოველთვის კომფორტულად გრძნობდა თავს, მაგრამ გასულ ზაფხულში ორწლიანი კონტრაქტი აღარ გაუგრძელეს – ახალგაზრდებს მეტი გასაქანი უნდა მივცეთო.
„კიოლნში“ გატარებულ ერთ სეზონს არც წარმატებული ერქვა და არც კატასტროფული. „კიოლნი“ მეორე ბუნდესლიგაში დაქვეითდა, 39 წლის პიზაროს კი ჯერაც არ დაჰკარგვოდა ბურთაობის სურვილი. ვინ აიყვანს გუნდში 39 წლის ფორვარდს? რა თქმა უნდა, „ვერდერი“.
ბრემენელ ფანებს სწამთ: თუ „პიცა“ გუნდშია, ყველაფერი კარგად იქნება. თავად პიზარო არ მალავს, რომ ბრემენში ფინალური აქტის სათამაშოდ და კარიერის დასასრულებლად დაბრუნდა. აქ ხომ ყოველთვის განსაკუთრებული ენერგიით იმუხტებოდა, რაც სხვა კლუბებშიც ჰყოფნიდა.
კარიერის შემდეგ ალბათ პერუში დაბრუნდება, სადაც ცხენსაშენი აქვს და ჯიშიან ბედაურებს არგენტინაში ყიდის. ყოველთვის გიჟმაჟი კლაუდიო ცხენებსაც ექსტრავაგანტურად ნათლავს: „მარიანპლაცი“ (ცენტრალური მოედანია მიუნჰენში), „ალიანც-არენა“, „კარლ-ჰაინცი“… ალბათ დოღზეც გააგრძელებს მსხვილი ფსონების დადებას მიუხედავად იმისა, რომ ცხოვრებაში 800 დოლარზე მეტი არ მოუგია… ალბათ ვერ შეელევა ბახუსის თანხლებით საჭესთან ჯდომის ჩვევასაც…
თუმცა, ეს ყველაფერი მხოლოდ ალბათობაა, რადგან არსებობს „ვერდერი“ და არსებობენ ბრემენელი ფანები, რომლებიც ჟამთასვლას საერთოდ ავიწყებენ.
„ვგრძნობ თუ არა თავს მობერებულად? როცა ბრემენში ვარ, თავს მხოლოდ კლაუდიო პიზაროდ ვგრნობ…“
