ყველა მწვრთნელს თავისი მეთოდი აქვს. ისიც ფაქტია, რომ ზაფხულის მოსამზადებელ პერიოდში ამ მეთოდების მიხედვით ბევრს ვერაფერს დაასკვნი, წარმატებული და წარუმატებელი სეზონის ბოლოს გამოჩნდება, მაგრამ თემა მაინც საინტერესოა. „მარკაც” სწორედ ამაზე ამახვილებს ყურადღებას.
ესპანურმა გაზეთმა „რეალის” ვალდებებასის საწვრთნელ ცენტრში შეიხედა. მართალია, „რეალის” ძირითადი შემადგენლობის ფეხბურთელები ბოლო დღეებამდე მეტწილად ჯერ კიდევ დასასვენებლად იყვნენ და ახალ მწვრთნელს ხულენ ლოპეტეგის, ქარიმ ბენზემას და გარეთ ბეილს თუ არ ჩავთვლით, სამარქაფო მოთამაშეებთან უწევდა მუშაობა, მაგრამ მასა და ზინედინ ზიდანს შორის ორი დიდი განსხვავება უკვე გამოჩნდა.
პირველი და მთავარი, რომელიც ფეხბურთელებს როგორც ჩანს ძალიან გაუხარდათ, შეღავათიანი ფიზიკური მომზადებაა. როდესაც მწვრთნელი ზიდანი იყო, არდადეგების შემდეგ საგანგებო ყურადღება ექცეოდა კროსებს. მოედნის გარშემო სირბილსა და „სანტიაგო ბერნაბეუს” ტრიბუნებზე ზედა რიგამდე არბენა-ჩამორბენას ბოლო არ ჰქონდა, ახლა კი მსგავსი აღარაფერი ხდება. მართალია ფიზიკური მომზადების მწვრთნელი პინტუსი სამსახურში დარჩა, მაგრამ ის მეთოდები, რომლებსაც იგი წინა წლებში იყენებდა წარსულს ჩაბარდა. გახურებისა და სპეციფიური გაჭიმვების გარდა მთელი სამუშაო ბურთით მიმდინარეობს.
და მეორე განსხვავება, რომელიც ფეხბურთელებმა ზიდანსა და ლოპეტეგის შორის შეამჩნიეს ფეხბურთელებთან ურთიერთობაა. ფრანგი სიტყვაძვირი იყო, ახალი თავკაცი კი მოთამაშეებს ხშირად ელაპარაკება, რითაც მეორე ეშელონის წევრები დანი სებალოსი, ბორხა მაიორალი, ვალეხო, ლორენტე და სხვანი კმაყოფილები ჩანან. ეტყობა ზიდანის დუმილი მათ თავს გუნდში დაბალი რანგის წევრებად აგრძნობინებდა. მაგალითად, სებალოსი ამბობს, რომ ლოპეტეგის მოსვლამ დამატებითი სტიმული მისცა და ახლა უფრო მეტი მოწადინებით ვარჯიშობს.
თანდათანობით კი ძირითადი შემადგენლობის მოთამაშეებიც ბრუნდებიან. თავად განსაჯეთ, სადაც ლოპეტეგი მარქაფის ხალხს ისე ეპყრობა, რომ თავს მნიშვნელოვან ფიგურებად აგრძნობინებს, როგორ შეხვდება სერხიო რამოსს, დანი კარვახალს, ნაჩოს, ისკოს, მარკო ასენსიოს და ლუკას ვასკესს. რამდენადაც „მარკასთვის” ცნობილია, ახალი მწვრთნელის მიმართ მათი მხიდანაც დიდი სიმპატია იგრძნობა.
