ლუკა მოდრიჩმა თქვა, რომ ნახევარფინალის წინა დღეებში ინგლისელები ხორვატიის ნაკრების მიმართ უპატივცემულობას ამჟღავნებდნენ, რამაც მას და მის თანაგუნდელებს დამატებითი სტიმული მისცა.
ხორვატთა 32 წლის კაპიტანმა ITV-სთან ინტერვიუში განაცხადა: „ვუსმედით ხალხს — ინგლისელ ჟურნალისტებსა და ექსპერტებს, რომლებიც ტელევიზიით გამოდიოდნენ და ვხედავდით, რომ ისინი ჯეროვნად არ გვაფასებდნენ. ეს მათი დიდი შეცდომა იყო. ჩვენ ვისმენდით, ვკითხულობდით მათ სიტყვებს და ვამბობდით: კეთილი, დღეს საღამოს ვნახავთ ვინ იქნება დაღლილი. მათ მეტი მოკრძალება და მეტოქის დაფასება სჭირდებოდათ.
ჩვენ ერთხელაც დავამტკიცეთ, რომ არ დავღლილვართ. მატჩმა მენტალურად და ფიზიკურად ჩვენი უპირატესობით ჩაიარა. მეტიც, გამარჯვების გოლი ძირითად დროშივე უნდა გაგვეტანა. ჩვენ ხორვატული ფეხბურთის ისტორიაში უდიდეს წარმატებას მივაღწიეთ. ოცნება აგვიხდა, რითაც ძალიან ვამაყობთ”.
ხორვატთა მარჯვენა მცველი, 26 წლის სიმე ვრსალკო: „წინასწარი ლაპარაკებიდან შეიძლებოდა დაგვესკვნა, რომ ინგლისმა ფეხბურთისადმი დამოკიდებულება შეცვალა და ამ ქვეყანაში გრძელ პასებსა და ჩაკიდებებზე დამყარებულ ფეხბურთს აღარ თამაშობენ. სინამდვილეში კი, როდესაც ჩვენ მარწუხები მოვუჭირეთ გამოჩნდა, რომ მათ თამაშის ახალი ხერხები სულაც არ აქვთ ათვისებული”.
29 წლის ივან პერიშიჩმა, რომელმაც ამ შეხვედრაში გოლი შეაგდო, დასძინა: „კარგად გვესმოდა, თუ რას ნიშნავდა ისეთი პატარა ქვეყნისთვის როგორიც ხორვატიაა, ფინალში გასვლა. შეხვედრა მძიმედ დავიწყეთ, ჩამოვრჩით, მაგრამ შემდეგ ისევე როგორც ფლეი-ოფის ყველა შეხვედრაში მტკიცე ხასიათი გამოვამჟღავნეთ და გავიმარჯვეთ. ოცი წლის წინ ჩემს მშობლიურ ქალაქში ვცხოვრობდი, ხორვატიის ნაკრების მაისურა მეცვა და თავგადაკლული ვგულშემატკივრობდი. მაშინ მხოლოდ ოცნება შემეძლო, რომ ერთ მშვენიერ დღეს ჩემი ქვეყნის ეროვნულ გუნდში ვითამაშებდი, მსოფლიოს ჩემპიონატის ნახევარფინალში გოლს გავიტანდი და ფინალში გავიდოდით”.
