საქართველოს ფეხბურთის ფედერაციის სპორტული სამართლიანობის დაცვის განყოფილებამ 29 ივნისს დააყენა შუამდგომლობა სფფ-ის სადისციპლინო და საფეხბურთო დავების განმხილველ კომიტეტში, რომლის სხდომაც გაიმართა სამშაბათს, 3 ივლისს.
სხდომა ეხებოდა ფოთის „კოლხეთს“. ფედერაციის განცხადებით, „კოლხეთის“ მიერ ადგილი ჰქონდა არაკეთილსინდისიერ ასპარეზობას და მატჩების მსვლელობასა და შედეგზე მანიპულირების მცდელობას.
უეფას თაღლითური ფსონების ამოცნობის სისტემის ანგარიშების საფუძველზე დადგინდა, რომ „კოლხეთის“ რამდენიმე მოთამაშე ერთმანეთთან შეუთანხმებლად ან ჯგუფურად ახორციელებდა მატჩების მსვლელობასა და შედეგზე მანიპულირებას.
სადისციპლინო კომიტეტი გაეცნო წარდგენილ დოკუმენტაციას, მოუსმინა „კოლხეთის“ წარმომადგენელს და სფფ-ის სადისციპლინო კოდექსის 126-ე მუხლის საფუძველზე მიიღო გადაწყვეტილება გუნდისთვის 6 ქულის დაკლების შესახებ. ამასთანავე, „კოლხეთის“ მოთამაშეებს – გუნდის კაპიტან ლაშა გოგონაიას, ბორის მახარაძეს, ზურაბ არზიანს, გიორგი კილასონიასა და თორნიკე ჯიმშელეიშვილს მიეცათ 6-თვიანი დისკვალიფიკაცია.
ვინაიდან, ფეხბურთში არასპორტული მეთოდების ნებისმიერი გამოვლინების მიმართ საქართველოს ფეხბურთის ფედერაციის შეურიგებელი პოზიცია უცვლელია, საქართველოს შინაგან საქმეთა სამინისტროსთან ურთიერთთანამშრომლობის მემორანდუმის ფარგლებში სფფ მიმართავს შესაბამის უწყებას, რომელიც საკუთარი კომპეტენციის შესაბამისად განიხილავს აღნიშნულ საკითხს.
„კოლხეთს“ 14 ქულა ჰქონდა და 10 გუნდს შორის, მერვეზე იყო. ახლა ჩამოაკლდა, 8 ქულა დარჩა და ბოლოზეა.
ისე, დიდი უცნაური ამბავი კია, გუნდი ჩაწყობაში ამხილეს და მხოლოდ 6 ქულის ჩამოკლებით დასაჯეს, ჩამწყობ ფეხბურთელებს კი მხოლოდ ექვსთვიანი დისკვალიფიკაცია აკმარეს…
თუმც რა, გამხელილ – აღიარებული არ არის, თორემ ამბობენ, საქართველოს ჩემპიონატის ყოველ ტურში რამდენიმე გარიგებული მატჩიაო… ამავდროულად კი ფეხბურთის ფედერაციის პრეზიდენტი ლევან კობიაშვილი სამართლიანი თამაშის წესებზე ლაპარაკობს…
P.S. ოფიციალურად არსად გაჟღერებულა, მაგრამ ეჭვი გვაქვს, რომ ფედერაციის რეაგირებას საფუძვლად “კოლხეთი” – “დინამოს” ბოლო მატჩი დაედო, რომელიც 3:6 დასრულდა.
