„როდესაც თამაშის წინ ჩვენმა მწვრთნელმა ტაე იონგ შინმა დავალების მოსაცემად ოთახში შეგვკრიბა გვითხრა, რომ გერმანელ ფეხბურთელებს ცხვირები აქვთ აწეული, ისინი ამპარტავნები არიან, უკვე ყველაფერი აქვთ მოგებული და გულის სიღრმეში აღარაფრის მოგება არ უნდათ. გერმანიას წარმატება აღარ სწყურია!”, — იგონებს 29 წლის კორეელი ჯა ჩოელ კოო „ბილდთან” ინტერვიუში.
გამოცემა წერს, რომ კოოსთვის აუტსაიდერობა კარგად ნაცნობი შეგრძნებაა. როგორც „აუგსბურგის” ფეხბურთელი ის ბუნდესლიგაში ყოველდღე ამ გრძნობით ცხოვრობს, მაგრამ მსოფლიოს ჩემპიონატმა კორეელი შეცვალა და ეს უპირველეს ყოვლისა იმის გამო მოხდა, რომ მისმა ნაკრებმა მსოფლიოს ყოფილ ჩემპიონს, გერმანიას 2:0 მოუგო — ჯგუფში ჩატოვა. თან, ხსენებულ F ჯგუფში, საიდანაც ფლეი-ოფში შვედეთი და მექსიკა მოხვდნენ, კორეა მესამე ადგილზე გავიდა, ხოლო გერმანია ბოლოზე.
კოომ განაგრძო: „ტაე იონგ შინი გერმანელებს ჯგუფური ეტაპის პირველ ორ თამაშშიც აკვირდებოდა და დაასკვნა, რომ მათ არ უყვართ, როდესაც მთელი ძალებით უტევენ. მან გვითხრა: თუ შევძლებთ ვიყოთ აგრესიულები, ამ საქმიდან რაღაცას გამოვიყვანთ. და ჩვენ, ფეხბურთელები სათამაშოდ სწორედ ამ განწყობით გავედით”.
მწვრთნელის ანალიზი მართალი გამოდგა. კოომ დასძინა: „მოედანზე რომ გავედი, თავად დავინახე, რომ გერმანელებს მოგების წყურვილი არ კლავდათ — ბევრს არ გადაადგილდებოდნენ, არც აგრესიულები ჩანდნენ. ჩვეულებრივ, ისინი გაცილებით ძლიერები არიან. მათთან თამაშის დროს გიჭირს, ისინი ერთზე ორნი მოდიან, მაგრამ იმ დღეს მსგავსი არაფერი მომხდარა. შუა თამაშის დროს გავიფიქრე, იქნებ მოვიგოთ კიდეც”.
