იცით, როგორ დატოვა ნეიმარმა სანკტ პეტერბურგის სტადიონი? თავზე ჩამოფხატული ქუდით — გეგონება ვერავინ იცნობდა — და საოცრად გაღიზიანებულმა. სტრესის პირას მყოფს ჰგავდა. დაახლოებით ასმეტრიანი მიქს-ზონა, სადაც ჟურნალისტები ფეხბურთელებს ხვდებიან, ბრაზილიელმა უსაინ ბოლტივით ჩაირბინა. სტადიონის ამ ზონაში 400 ჟურნალისტი იყო თავმოყრილი. ნეი ერთსაც კი არ გაუჩერდა.
„პარი სენ ჟერმენის” ვარსკვლავი პირველი თამაშის შემდეგ ბრაზილიური მას-მედიის კრიტიკამ გაანაწყენა. კოსტა რიკასთან მოგების შემდეგ (2:0) მან „ტვიტერზე” დაწერა: „არავინ იცის რა გადავიტანე აქ რომ მოვხვედრილიყავი. მატჩის შემდეგ ვტიროდი. ეს ბედნიერების, გამარჯვების, მოგების წყურვილის ცრემლები იყო”.
თვითმხილველები ამბობენ, რომ ნეიმარი მთელ მსოფლიოზე გაბრაზებულ, გაღიზიანებულ ადამიანს ჰგავს. თანაგუნდელების და მწვრთნელის გამამხნევებელი სიტყვები არ ჰყოფნის. მას პრესაც უფრო გაგებით უნდა მოეპყრას და მსაჯებმაც მეტად უნდა დაიცვან აგრესიული მოწინააღმდეგეებისგან. წერენ, რომ დღეს აღარავის ახსოვს როგორ დაშავდა ნეი მსოფლიოს წინა ჩემპიონატზე, სადაც ბოლო თამაშების გამოტოვება მოუხდა. ეს მისთვის მტკივნეული იყო.
რუსეთში ნეიმარი ჯერჯერობით მხოლოდ ცრემლთ, მელანქოლიით და ბრაზით გამოხატავს თავის პოზიციას. პრესასთან არაფერს ამბობს.
ბრაზილიელთა მწვრთნელმა ტიტემ თქვა, რომ ნეის საუკეთესო ფორმაში შესასვლელად ხუთი თამაში სჭირდება, მაგრამ ფაქტია — თუკი მისი ფსიქოლოგიური მდგომარეობა არ გამოსწორდება, შეიძლება გეგმა აირიოს. კოსტა რიკასთან შეხვედრაში ტელეეკრანზეც კი გამოჩნდა, როგორ დაუძახა ბრაზილიელმა ერთ-ერთ მეტოქეს „ბოზიშვილო”, ხოლო როდესაც ვიდეორეფერის ჩარევის შემდეგ არბიტრმა დანიშნული პენალტი გააუქმა და აღელვებული ნეიმარის დასაშოშმინებლად ფორვარდი ხელით გაწია, მან დაიყვირა: „არ შემეხო”!
ზოგი გამოცემა წერს, რომ ნეიმარი, რომელსაც მსოფლიოს ჩემპიონატზე ვუყურებთ გუნდის ლიდერი კი არა, მაჩხუბარა და ჭინჭყლია. კოსტა რიკასთან თამაშის მსაჯს ის შესვენებისას გვირაბშიც კი მიუხდა.
„ნეიმარი მანქანა არ არის, ჩვენსავით ადამიანია და გრძნობები აქვს. ის ჩვენი გუნდის საკვანძო ფეხბურთელია”, — თქვა პრეს-კონფერენციაზე ტიტემ.
