საქართველოს ძიუდოს ფედერაციის პრეზიდენტი გადადგა. ერთის მხრივ გული დამწყდა – დათო ქევხიშვილი სულ პატარა ბიჭი რომ იყო და ნაკრებში შეაბიჯა, იმის მერე მის მიმართ სიმპათია მაქვს.
წესიერი კაცია, მაგრამ წესიერება კარგ მენეჯერობას არ უდრის.
აირია ძიუდოში საქმე. ძაღლი პატრონს ვერ ცნობს. ორ კვირამდეღა დარჩა მსოფლიოს ჩემპიონატამდე და ჩვენ სამაგისოდ გვცალია?!
ფულებზე ვკამათობთ! იარაღს ვისვრით! სისხლი დაიღვარა!!! ბატონო შოთა (ხაბარელო), იცით, რომ გაღმერთებთ, მაგრამ ეგ შეცდომა არ უნდა დაგეშვათ – პარლამენტში არ უნდა წასულიყავით. სანამ ხაბარელი თავკაცობდა ნაკრებს, კაი ბიჭი იყო და მის წინააღმდეგ ფედერაციის კი არა, ოლიმპიური კომიტეტის პრეზიდენტი წასულიყო.
მერე უპატრონო ეკლესიას ეშმაკებმა მოუნდომეს დაპატრონება. ყველამ ის საქმე უნდა აკეთოს, რაც ყველაზე მეტად გამოსდის…
ბატონო შოთა, პარლამენტის ერთი ასორმოცდამეათედი ხართ და მოდით, მიხედეთ ამ ბავშვებს და საქმეს, რომელშიც ვერავინ შეგედრებათ.
