რობერტ ლევანდოვსკის „ბაიერნიდან” წასვლა უნდა. ამასთან დაკავშირებით, გულშემატკივრების, ფეხბურთელების და მათი აგენტების ყურადღება მიუნხენისკენ არის მიპყრობილი — როგორ მოიქცევა „რეკორდმაისტერი”? არ არის გამორიცხული ბავარიული კლუბის შეფები გაჯიქდნენ და პოლონელს კატეგორიულად მოსთხოვონ კონტრაქტში ჩაწერილი ვადის ბოლომდე დარჩენა. ეს ვადა 2021 წლამდეა. შესაძლოა ხელფასის მომატებაზე დაელაპარაკონ და შესაძლოა მართლაც გაყიდონ.
ჯერჯერობით, ყველაფერი გაურკვეველია. რასაკვირველია, ბევრი რამ იმაზე იქნება დამოკიდებული, მოძებნიან მიუნხენელი ბოსები ლევანდოვსკის ტოლ შემცვლელს თუ ვერა. ფეხბურთელის აგენტი, ცნობილი პინი ზაჰავი ამ საქმეში „ბაიერნს” დახმარებას სთავაზობს.
ებრაელი სუპერაგენტის გეგმა ასეთია: ერთ-ერთ ტოპ-კლუბს ლევანდოვსკის სანაცვლოდ „ბაიერნისთვის” არა მხოლოდ მილიონები გადაახდევინოს, არამედ ზედ თავდამსხმელიც მოაყოლებინოს.
შესაძლოა პირდაპირი გაცვლაც. მაგალითად, ფიფას მიერ დასჯილ „პარი სენ ჟერმენს” ამჟამად ფინანსური ტრანსფერების ნება არ აქვს, მაგრამ სანაცვლოდ ჰყავს 31 წლის ედინსონ კავანი, რომლის საბაზრო ღირებულებაა 60 მილიონი ევრო. ურუგვაელი პარიზში წესით 2020 წლამდე უნდა დარჩეს.
„ჩელსის” ვარიანტის განხილვაც შეიძლება: ლონდონელები ლევანდოვსკიში დიდძალი ფულის გადამხდელები არ არიან, მაგრამ მათ განკარგულებაშია ესპანელი თავდამსხმელი ალვარო მორატა, 25 წლის, 65 მილიონიანი საბაზრო ღირებულებით. მორატას „ლურჯებთან” 2022 აქვს კონტრაქტი გაფორმებული.
„მანჩესტერ იუნაიტედს” ფული აქვს, მაგრამ ლევანდოვსკში გასაცვლელი თავდამსხმელი არ ჰყავს.
„რეალმა”, როგორც ამბობენ, ამ საქმისგან ხელი დაიბანა.
