კატალონიური „სპორტი” წერს, რომ „ბარსელონას” ამ ზაფხულში შესაძენი ფეხბურთელების კარგად გათვლილი სია აქვს შედგენილი. ის კი არა და „ბლაუგრანას” შეფებს სათადარიგო სიებიც კი ჩამოუწერიათ. ასე მაგალითად, იმ შემთხვევაში თუ რაიმე მიზეზით „ატლეტიკოსგან” ანტუან გრიზმანის ყიდვა ჩაეშლებათ, „ტოტენჰემისგან” დანიელი კრისტიან ერიკსენის შეძენას შეეცდებიან.
„რასაკვირველია, გრიზმანი და ერიკსენი განსხვავებული სტილის ფეხბურთელები არიან, მაგრამ „ბარსელონაში” ვარაუდობენ, რომ ფილიპე კოუტინიუს უნივერსალურობის წყალობით ერიკსენისთვის გუნდში ადგილი მოიძებნება” — წერს „სპორტი”.
როგორც ზემოთ ავღნიშნინეთ, ერიკსენის გვარი სათადარიგო სიაშია, მთავარი სიის სათავეში კი გრიზმანი წერია. „ბარსას” წარმომადგენლები მას უკვე ელაპარაკნენ და ისიც კარგად მოეხსენებათ, თუ რა მოწადინებულია ფრანგი, რომ თავისი ისედაც მაღალი ოსტატობა კიდევ უფრო დახვეწოს. ამასთან გრიზმანის გამოსასყიდი ფასი, 100 მილიონი ევრო, დღევანდელი „ინფლაციის” პირობებში არც ისეთი საშინელია, მაგრამ ყველაფერი ხდება…
„სპორტის” აზრით თუ „ბარსელონა” რაიმე მიზეზით მაინც ერიკსენს შეიძენს, კოუტინიუ წინ გადავა, იქ სადაც ნომინალურად ლეო მესი, ოსმან დემბელე და ლუის სუარესი არიან.
თუმცა, არც ერიკსენის შეძენაა მარტივი. „ტოტენჰემმა” დანიელი თავის დროზე „აიაქსისგან” მხოლოდ და მხოლოდ 13,5 მილიონ ევროდ იყიდა და თუ გაყიდის მაქსიმალური სარფის ნახვას შეეცდება.
არის მეორე ვარიანტიც, რომ ლონდონელებმა ერიკსენის გაყიდვაზე ქვა ააგდონ და თავი შეუშვირონ — ისინი ხომ არგენტინელ მწვრთნელ მაურისიო პოჩეტინიოს არ უშვებენ. პირიქით, მასთან ახალი კონტრაქტი გააფორმეს და ახლა მისი საყვარელი შემადგენლობის შემომტკიცებას ცდილობენ — დელე ალისთვის, ჰარი კეინისთვის, ერკისენისთვის და სხვა წამყვანი მოთამაშეებისთვის ახალ კონტრაქტებს ამზადებენ.
ერთი სიტყვით, ერიკსენი თავის მომავალს ამ ეტაპზე „სფურზში” ხედავს. ბოლოს და ბოლოს ის „ბარსელონას” სათადარიგო სიაშია, რაც იმას ნიშნავს, რომ კატალონიელები შეიძლება არც კი გამოჩნდნენ ჰორიზონტზე.
