„ბარსელონას” მცველმა ჯორდი ალბამ თქვა, მართალია „რეალის” ყველა ფეხბურთელთან კარგი ურთიერთობა მაქვს, მაგრამ ვოცნებობ მათ უკლებლივ ყველა თამაში წააგონო — ასეთია 29 წლის კატალონიელის დამოკიდებულება ჩემპიონთა ლიგის ფინალის წინ, სადაც მადრიდელები „ლივერპულს” ხვდებიან.
ალბას დიდი იმედი აქვს, რომ შაბათ საღამოს „რეალისთვის” ჩემპიონთა ლიგაში გამარჯვების მილოცვა არ მოუწევს. შარშან, როდესაც „თეთრებმა” „იუვენტუსი” დაამარცხეს ბარსელონელს ამის გაკეთება მოუხდა.
„მართალია შარშან მივულოცე, მაგრამ წლეულს არ მინდა, რომ იგივე განმეორდეს”, — თქვა ალბამ.
შეგახსენებთ, რომ თუ „რეალი” თასს მოიგებს, ეს მისთვის ზედიზედ მესამე ტრიუმფი იქნება, სულ კი მეცამეტედ მოიპოვებს ევროპული საკლუბო ფეხბურთის ყველაზე პრესტიჟულ ჯილდოს.
როგორც იცით, ერთი ხნის წინ დიდი ხმაური იყო იმის გამო, რომ „რეალმა” „ბარსელონას” უშუალოდ შეხვედრის დღეს საპატიო დერეფანი არ მოუწყო — არადა, იმ ტურისთვის „ბარსას” ლა ლიგის ჩემპიონის ტიტული უკვე მოპოვებული ჰქონდა. ალბა ამბობს, რომ ეს ამბავი სკანდალად არ ღირდა:
„უფრო მედია ხმაურობდა, ვიდრე გუნდები. „რეალს” თავისი მიზეზი ჰქონდა რატომაც არ მოგვიწყო დერეფანი, თუმცა ამას რა მნიშვნელობა აქვს. ჩემპიონები მაინც ჩვენ ვართ”.
ჯორდი ალბამ „ბარსას” ლიდერთან ლეო მესისთან ურთიერთობაზეც ილაპარაკა. ის არგენტინელით რასაკვირველია აღფრთოვანებულია, მაგრამ იმასაც ამბობს, რომ თუკი მსოფლიოს ჩემპიონატზე ალბისელესტე ესპანეთის ნაკრებს შეხვდება, არ დაგიდევთ ვინ იდგება მის წინააღმდეგ.
„როდესაც ვთამაშობ მეგობრები არ მყავს. მამაჩემსაც კი არ მივცემ ჩემი დამარცხების უფლებას”.
როგორი ფეხბურთელია ლეო?
„ის მსოფლიოში საუკეთესოა და ვინაიდან ვიცი, რომ არასდროს არაფერი შეეშლება, ბურთს ყოველთვის მას ვაწვდი. ერთმანეთის კარგად გვესმის და მოედანზე ერთმანეთს ვეძებთ, თუმცა ისიც ფაქტია, რომ მეტოქეებმა ჩვენი კომბინაციის ამბავი უკვე კარგად იციან”.
ჩემპიონთა ლიგის მეოთხედფინალში „რომასთან” რატომ წააგო „ბარსელონამ” 0:3?
„პირველი თამაშის შემდეგ დიდი უპირატესობა გვქონდა, მაგრამ იმ დღეს ცუდ ფეხზე ავდექით. ვერავინ ხსნის რატომ წავაგეთ 0:3, მაგრამ ფაქტია, რომ წავაგეთ. თუ არ დაიქოქები ასეთი რამ გადაგხდება”, — უპასუხა ჯორდი ალბამ.
