იურგენ კლოპი ამბობს, რომ შაბათს, კიევში, ჩემპიონთა ლიგის ფინალში, „რეალითან” მის „ლივერპულს” გამარჯვების კარგი შანსი აქვს.
„მოწინააღმდეგეს მართლა ძალიან ძლიერი გუნდი ჰყავს, მაგრამ ერთი კარგი ამბავი მაქვს: ჩვენც კარგი გუნდი გვყავს”, — თქვა კლოპმა პრეს-კონფერენციაზე, რომელიც ფინალისთვის მზადებას მიეძღვნა.
მადრიდელები ბოლო ხუთ წელიწადში ოთხჯერ იყვნენ ჩემპიონთა ლიგის ფინალში და გასაკვირი არ არის, რომ ფავორიტებად ითვლებიან, თუმცა კლოპი ამბობს, რომ ამ ფაქტს ზედმეტი ყურადღებაც არ უნდა მივაქციოთ.
„გამოცდილება ფეხბურთში მნიშვნელოვანია, მაგრამ მისი გაბათილება შეიძლება ფიზიკური მომზადებით, ჟინით და თავდადებით. ჩვენ ამ თამაშში მეტოქეზე მეტი უნდა ჩავდოთ. ცხადია, ყველაფერი ისე ვერ აეწყობა როგორც გვინდა, მაგრამ იმედგაცრუება წამითაც არ უნდა მოგვერიოს. უშიშრად უნდა ვითამაშოთ”, — განმარტა გერმანელმა.
ძალიან ბევრი რამ იქნება დამოკიდებული თავდამსხმელთა ტრიოზე — საიდო მანე, რობერტო ფირმინო და მოჰამედ სალაჰი.
„ჩვენთვის ეს კარიერის ერთ-ერთი უმნიშვნელოვანესი თამაში იქნება, — თქვა მანემ, რომელიც პრეს-კონფერენციაზე მოტივაციას ასხივებდა, — მოედანზე გავალთ და ყველა ღონეს ვიხმართ რომ მოვიგოთ. იმედია გავიმარჯვებთ კიდეც”.
და კიდევ, კლოპი ამბობს, რომ ფინალისთვის მის გუნდს საგანგებო მომზადება არ სჭირდება.
„სეზონის განმავლობაში ბევრს ვლაპარაკობდით, ამიტომ მე აღარ ჩავატარებ ოთხსაათნახევრიან კრებას იმის გასარჩევად, თუ როგორ უნდა ვითამაშოთ ფინალში” — დასძინა ინგლისური გუნდის გერმანელმა თავკაცმა.
