„არსენალის” შეფებმა ტიერი ანრის შეხვედრა სთხოვეს. თემა — მწვრთნელის ვაკანსია. თუმცა, ინგლისური პრესის აზრით „მეთოფეთა” მთავარსარდლობის პირველ კანდიდატად მაინც მიკელ არტეტა რჩება.
არტეტა, ისევე როგორც ანრი, ყოფილი არსენალელია, მაგრამ ესპანელისგან განსხვავებით ფრანგი ლეგენდაა და მისმა პასუხმა შეიძლება ყველაფერი ყირაზე დააყენოს. ამჟამად ანრი ბელგიის ნაკრებში რობერტო მარტინესს ეხმარება. 2016 წლამდე კი ის ცოტა ხნით „არსენალში” ყმაწვილებს წვრთნიდა. მაშინ, არსენ ვენგერმა შეაწყვეტინა საქმიანობა — ტელეკომპანია „სქაიში” და „არსენალის” 18-წლამდელებში ერთდროულად სრული დატვირთვით ვერ იმუშავებო, უთხრა ყოფილ შეგირდს.
დღეს ტიერი ანრი ორმოცი წლისაა. ის „მეთოფეთა” ისტორიაში ყველაზე დიდი ბომბარდირი გახლავთ — 369 თამაშში 226 გოლი შეაგდო. ბელგიელთა ერთ-ერთი მწვრთნელის ამპლუაში წარმატებულია. ამბობენ, რომ ის პროფესიის ეშხში შევიდა და საქმეს სიამოვნებით აკეთებს.
რაც შეეხება არტეტას, 36 წლის ყოფილი ნახევარმცველი „მანჩესტერ სიტიში” პეპ გვარდიოლას ასისტენტობას წევდა, რაც ცხადია დიდი გამოცდილებაა.
სხვათა შორის, ზოგი ვარაუდის თანახმად სულაც არ არის აუცილებელი, რომ ლონდონელთა დირექტორებმა ანრის მაინცდამაინც მთავარი მწვრთნელობა შესთავაზონ, თუმცა მაინც უფრო სავარაუდოა, რომ სწორედ ამ პოზიციაზეა ლაპარაკი.
ცნობილია, რომ არსენ ვენგერის გადადგომის მიუხედავად სამსახურში დარჩენა შესთავაზეს „არსენალის” სხვადასხვა რანგისა და პროფილის მწვრთნელებს, ყოფილ ფეხბურთელებს იენს ლემანსა და სტივ ბოულდს, ხოლო ანრის კიდევ ერთი ყოფილი თანაგუნდელი ფრედი ლიუნგბერგი 23 წლამდელთა გუნდის თავკაცად დანიშნეს.
