ლეგენდარული სერ ალექს ფერგიუსონი მძიმედაა. მას ინსულტი მოუვიდა და ტვინის სასწრაფო ოპერაცია დასჭირდა. „მანჩესტერ იუნაიტედის” ყოფილი თავკაცი 76 წლისაა. ექიმები ამბობენ, რომ მისი მდგომარეობა სერიოზულია.
როგორც ინგლისურმა მას-მედიამ შეიტყო, სერ ალექსი შინ, უილმსლოუში, რომელიც დიდ მანჩესტერში მდებარეობს, ცუდად შეიქნა და 5 მაისს დილის 9 საათზე ოჯახმა სასწრაფო გამოუძახა. შემდეგ სასწრაფომ და პოლიციის ესკორტმა ის სასწრაფოდ „სელფორდ როიალ ჰოსპიტალში” წაიყვანეს.
ავადმყოფს გვერდიდან არ მოშორებიან მეუღლე კეთი და ვაჟები — მარკი, დარენი და ჯეისონი. ფერგიუსონი 1966 წელს დაქორწინდა.
ოპერაციის შემდეგ სერ ალექსი ხელოვნურ კომაში შეიყვანეს.
ლეგენდარული საფეხბურთო მოღვაწის მდგომარეობა ორმაგად შოკისმომგვრელია, რადგან ის არაფერს უჩიოდა, ფიზიკურად შესანიშნავად იყო და ყველაფერი ძალიან მოულოდნელად მოხდა.
საფეხბურთო სამყაროს კარგად ახსოვს, რომ ინსულტამდე სულ რაღაც ხუთი დღით ადრე ალექს ფერგიუსონმა „ოლდ ტრეფორდზე” „არსენალის” მწვრთნელ არსენ ვენგერს ლონდონის კლუბში 22 წლიანი კარიერის დასრულების აღსანიშნავად სამახსოვრო საჩუქარი გადასცა და ინტერვიუებიც უხვად დაარიგა.
სერ ალექსი ცნობილია დოღის ცხენებისა და ღვინის სიყვარულით.
მან მწვრთნელობას თავი 2013 წელს დაანება, მას მერე, რაც ბოლოჯერ გახდა პრემიერლიგის ჩემპიონი.
ფერგიუსონი „მანჩესტერ იუნაიტედს” 26 წელიწადი ედგა სათავეში.
