ინგლისურ პრესაში აქა-იქ იწერებოდა, რომ არსენ ვენგერის „არსენალის” მწვრთნელობიდან გადადგომის ნამდვილი მიზეზი „მეთოფეთა” ბანაკში იყო საძიებელი. და აი, ლონდონელთა ლეგენდამ ცოტათი აჰხადა საიდუმლოს ფარდა — 68 წლის ფრანგმა 22 წლიანი ეპოქის დასასრულის ერთ-ერთ მიზეზად გულშემატკივრები დაასახელა. მათ შორის განხეთქილება იყო, ჩემი მომავლის გამო გაუთავებლად დაობდნენო.
ვენგერმა თქვა: „ამ კლუბს მთელს მსოფლიოში გაცილებით მეტ პატივს სცემენ, ვიდრე საკუთრივ ინგლისში. ჩვენმა ფანებმა ვერ გამოამჟღავნეს საყოველთაო ერთსულოვნება, რაც ძალიან გულდასაწყვეტი იყო. „არსენალს” ყველგან დიდ პატივს ცემენ, ის იმიჯი კი, რომელიც ჩვენ მას ბოლოხანს შევუქმენით ძალიან განსხვავდებოდა იმისგან, მე რომ მსურდა.
საერთოდ, სპორტი გამარჯვებებისა და დამარცხებებისგან შედგება, თუმცა იმავდროულად ის გაცილებით მეტია, ვიდრე მხოლოდ მოგება-წაგება. ჩემთვის ყოველთვის მნიშვნელოვანი იყო როგორ აღიქვამდნენ „არსენალს” აფრიკელი, ჩინელი თუ ამერიკელი ბავშვები. მნიშვნელოვანი იყო, თუ რა ოცნებები ვაჩუქეთ დედამიწის სხვადასხვა კუთხის ყმაწვილებს, რომლებსაც ფეხბურთის თამაში უნდათ. ჩვენი კლუბები ასეთ რამეებზე პასუხისმგებლები არიან.
და მაინც, ფანებზე ნაწყენი არ გახლავართ. უბრალოდ, ვფიქრობ, რომ ის, რისკენაც მივისწრაფი და რაც სწორად მიმაჩნია გაცილებით მნიშვნელოვანია, ვიდრე ჩემი თანამდებობაზე დარჩენა ან არ დარჩენა. გულშემატკივრებს კი შედეგები არ მოსწონდათ და მე ეს მესმის. მე ამასთან შეგუება მომიწევს”.
შემდეგ, ვენგერს ჰკითხეს, ურჩია თუ არა მან კლუბის ხელმძღვანელებს ვინმე თავის შემცვლელად. „მეთოფეთა” ჯერ კიდევ თავკაცმა უპასუხა, რომ ახალი მწვრთნელის არჩევასთან მას შეხება არ აქვს. კიდევ, ფრანგმა განაცხადა, რომ ის არ დაღლილა, რასაც იმით დაამტკიცებს, რომ ყოველგვარი დასვენების გარეშე დაიწყებს მუშაობას ახალ გუნდში.
ახალი გუნდი კვლავ პრემიერლიგისა იქნება?
„ამწუთას გადაჭრით ვერ დავიქადნი, რომ ინგლისში აღარადსოდეს ვიმუშავებ, შეიძლება ვიმუშაო კიდეც, მაგრამ ფაქტია, რომ ემოციურად ძალიან მიბმული ვარ „არსენალზე” და მომავალშიც უპირველესად ამ გუნდის ანგარიშებს მოვიძიებ ხოლმე”.
