ბრაზილიის ნაკრებმა ბერლინში გარმანელებს 1:0 მოუგო. როგორც „შპორტ ბილდი” წერს, ეს ამბავი 2014 წლის მსოფლიოს ჩემპიონატზე გერმანელთა მიერ ბრაზილიელების 7:1 განადგურებიდან 1358 დღის შემდეგ მოხდა. იოლი მისახვედრია, გერმანულმა გამოცემამ დღეები იმიტომ დაითვალა, რომ მაშინდელი 7:1 ეხსენებინა.
სელესაომ გერმანელთა 22 მატჩიან წაუგებელ სერიას დაუსვა წერტილი. ბოლოს იოაჰიმ ლიოვის გუნდი 2016 წლის ევროპის ჩემპიონატის ნახევარფინალში, ფრანგებთან დამარცხდა, 0:2.
ბრაზილიელებს არ ჰყავდათ ყველაზე სახელოვანი ვარსკვლავი, ნეიმარი. სხვა მხრივ სამხრეთ ამერიკელთა შემადგენლობას ექსპერიმენტულს ვერ დაარქმევდი. საინტერესოა, რომ ბერლინში ითამაშა ოთხი წლის წინანდელი 7:1-ის მონაწილე ოთხმა ფეხბურთელმა: მარსელომ, ვილიანმა, პაულინიომ და ფერნანდინიომ. მათთვის ეს გამარჯვება ალბათ ერთგვარი ფსიქოლოგიური რეაბილიტაცია იყო, თუმცა სრულყოფილი შურისძიება ვერ იქნებოდა.
რაც შეეხება გერმანიის ნაკრებს, მის შემადგენლობაში ესპანეთთან რამდენიმე დღის წინანდელ შეხვედრასთან (1:1) შედარებით 7 ახალი ფეხბურთელი თამაშობდა: ტრაპი, პლატენჰარდტი, რუდიგერი, გუინდოგანი, სანე, გორეცკა და გომესი.
გულშემატკივრების სტადიონზე შესვლასთან დაკავშირებული პრობლემის გამო მატჩი, რომელსაც გერმანიის კანცლერი ანგელა მერკელი ესწრებოდა, ხუთი წუთის დაგვიანებით დაიწყო.
შეხვედრის ერთადერთი გოლი 37-ე წუთზე გაბრიელ ჟესუსმა გაიტანა.
მატჩის შემდგომ გერმანელმა „ტროლებმა” ინტერნეტში იხტიბარი არ გაიტეხეს და დაპოსტეს: ახლა უკვე 7:2-ია.
