ევროპის ჩემპიონატის შესარჩევი ციკლისთვის მზადების საგაზაფხულო ეტაპი მაჟორულ ნოტაზე დავასრულეთ: ორიდან ორი მოგება, ექვსი გატანილი და არც ერთი გაშვებული ბურთი. კი, ბატონო, არც ლიტვა და არც ესტონეთი საშუალო ევროპულ გუნდებსაც არ განეკუთვნებიან, მაგრამ ციდან ვარსკვლავებს არც ჩვენ ვწყვეტთ.
ვაკეში, “მესხზე”, ესტონელებთან მატჩი სამი დღის წინანდელის ალი-კვალი გამოდგა. ოღონდ დღევანდელმა მეტოქემ ლიტვაზე კერკეტი კაკლის შთაბეჭდილება დატოვა. მით უფრო დასაფასებელია, რომ ჩვენი გუნდი საკუთარი ხელწერის ერთგული დარჩა. მიუხედავად სანახევროდ გადახალისებული შემადგენლობისა, ისევ ბევრი მოძრაობა უბურთოდ, აქტიური ფლანგები, ლამის მეტოქის საჯარიმოსთანვე დაწყებული პრესინგი.
მოძრაობისა და ერთმანეთის კარგად დაზღვევის ხარჯზე ჩვენები მეტოქეს მუდმივად “ფეხზე აჯდნენ” და პირველ ტაიმში უმოწყალოდ დაჩაგრეს. შედეგმაც არ დაახანა: ჯერ ტაბიძის ადრიანმა და მისთვის სადებიუტო გოლმა მოხსნა ვლადიმირ ვაისის შეგირდებს წნეხი, მერე კი ყაზაიშვილის შედევრი იყო. ვაკომ ერთი მოძრაობით ორი მეტოქე დატოვა უსაქმოდ და ბურთი თითქოს მარცხენა ფეხზე გადმოიტანა, მაგრამ მოულოდნელად მარჯვენა ტერფის გარე ზედაპირით დაარტყა. ბურთი ლამაზი ტრაექტორიით გადაცდა კარიდან ოდნავ წინ გამოსულ მეერტს და ცხრიანში შეფრინდა!
პირველმა ნახევარმა დაგვარწმუნა, რომ ლიტვასთან მოგება არ ყოფილა შემთხვევითი. მეორე ნახევარი სამი დღის წინანდელის ალი-კვალი იყო, რაც გვაფიქრებინებს, რომ ვაისმა ორივეჯერ განზრახ მეორე ნომრად და კონტრშეტევებზე თამაშის შემოწმება ისურვა და ტემპის დაგდებაც მისი გეგმის ნაწილი იყო. დაცვაში მაინც და მაინც “ხანძარი” არ გაგვჩენია და სწრაფი კონტშეტევებიც გამოგვდიოდა. ბოლო დარტყმებისას რომ გვევარგა, ანგარიში მეტოქისთვის კატასტროფული იქნებოდა. განწყობა ამაღლებულია. გუნდს მწვრთნელის ხელიც ეტყობა და სპორტული ჟინიც. ცოტა მეტი მონდომება, ცოტაც ყისმათი და… ვინ იცის, ეგებ ახდეს…
27 მარტი. თბილისი. “მიხეილ მესხი”. 19 000 მაყურებელი.
საქართველო 2:0 ესტონეთი
გოლები: 1:0 ტაბიძე (6), 2:0 ყაზაიშვილი (35). საქართველო: მაკარიძე, კაკაბაძე, ტაბიძე, კვერკველია (კაშია, 85), კანკავა, ყაზაიშვილი, კვეკვესკირი, კაჭარავა (არაბული, 69, ქვილითაია, 77), შერგელაშვილი (დვალი, 62), მერებაშვილი (ჯიღაური, 62), პაპუნაშვილი (აბურჯანია, 83)
ესტონეთი: მეერტსი, პიკი (კრუგლოვი, 62), ანიერი (ლუტსი, 62), ზენიოვი, ლეპისტუ (დმიტრიევი, 69), კლავანი, ანტონოვი (ალ. დმიტრიევი, 46), ტენი (ელჰი, 69), მოროზოვი, ტამი.
