შაბათს, ლიტვასთან ამხანაგური მატჩის მე-6 წუთზე ჯანო ანანიძე ბურთის მეტოქის საჯარიმოში ჩაკიდებას ცდილობდა, როცა უხერხულად დაეცა და მოედნიდან საკაცით გაიყვანეს. დღეს კი ცნობილი გახდა, რომ ჯანოს მუხლის ჯვარედინი იოგები დაუზიანდა და მინიმუმ ექვსი თვე ვერ ითამაშებს.
დიდი ალბათობით, მას რომის „ვილა სტიუარტის“ ჰოსპიტალში გაუკეთებენ ოპერაციას, რომელთანაც მოსკოვის „სპარტაკს“ ხელშეკრულება აკავშირებს.
წესით, ჯანოს მკურნალობის ხარჯები საქართველოს ფეხბურთის ფედერაციას უნდა გაეღო, მაგრამ კლუბი მოითხოვს, რომ ქირურგიული ჩარევა მათი კონტროლის ქვეშ ჩატარდეს და სავარაუდოდ ასეც მოხდება.
შარშან ოქტომბერში ანანიძეს ამავე ჰოსპიტალში გაუკეთეს ოპერაცია და ხანგრძლივი რეაბილიტაციის შემდეგ მინდორზე სულ ახლახან, 4 მარტს „ლოკომოტივთან“ მატჩში გამოჩნდა. გამოჩნდა და აგერ, ახლა ისევ სკამზე დაჯდა. რუსულ პრემიერლიგაში ამ სეზონში ქართველმა ოდენ 8 მატჩი ითამაშა.
მოკლედ, არ უმართლებს ჯანოს. ამდენი გაუცდა და ისევ საოპერაციოა.
ემოციებს რომ თავი დავანებოთ, ახლა უკვე ჯანოს ახლო მომავალიც გაურკვევლია.
ჯანოს „სპარტაკთან“ კონტრაქტი 2021 წლამდე აკავშირებს, ანუ კიდევ სამ წელიწადს ჩაითვლება „წითლების“ ფეხბურთელად, თუმცა რუსი სპეციალისტების ზარით, ასეთი ტრავმიანობის გამო, ქვეყნის ჩემპიონი მასთან თანაშრომლობას ალბათ აღარ მოისურვებს. ვნახოთ… არგუმენტად ისიც მოჰყავთ – ბოლო შვიდ წლიწადში სეზონი არ გასულა, ქართველს ტრავმა არ მიეღოსო,
ჯანო ბოლო დროის მართლაც ერთ-ერთი გამორჩეული მოთამაშე გახდა. ფიზიკურად მოისუსტებს, მაგრამ საფეხბურთო აზროვნებაში აბსოლუტურად განსხვავებულია. „სპარტაკში“ მას პირლოს ეძახიან, დღევანდელი საქართველოს ნაკრები კი მის გარეშე უკვე წარმოუდგენელია. როცა ჯანო მინდორზეა, „ჯვაროსნები“ სულ სხვა ხარისხის ფეხბურთს თამაშობენ.
იმედია, ყველაფერი კარგად დამთავრდება და ქობულეთელი ჯადოქარი კიდევ ხშირად გაახარებს ქართველ ქომაგს.
