თვის ბოლომდე სანაკრებო ამბები გვაქვს. ქვეყნების ბრძოლა მაინც სხვაა, მთავარი გუნდი როცა თამაშობს, ჩვენთან საფეხბურთო ინტერესიც მატულობს ხოლმე. ნაკრების თამაშებზე სტადიონზე ხალხი მოდის და ზოგჯერ ივსება კიდეც.
საქართველო VS ბალტიისპირელები
სასიამოვნოა ის ფაქტი, რომ ბოლო უქმეებზე ქართველმა ლეგიონერებმა შედეგიანად ითამაშეს. რამდენად გადმოიტანენ ამ შედეგს ნაკრებში, ეს გამოჩნდება. ვაკეში, „მიხეილ მესხზე“ 24 და 27 მარტს გვაქვს ამხანაგურები. ჯერ ლიტვასთან, მერე კი ესტონეთთან, რომელთანაც ორწელიწადნახევრის წინ სწორედ ამხანაგურში 0:3 წავაგეთ, ოღონდ სტუმრად და, ახლა რევანშის დროა.
ბევრს გაუჩნდა კითხვა: ლიტვასა და ესტონეთს უნდა ვხვდებოდეთ თუ უფრო ძლიერებს? ჯერ ერთი, იგივე კითხვა შეიძლება დაებადოთ ბალტიისპირელ ჟურნალისტებსაც. დროა, ზემოდან ყურებას მოვეშვათ. მეორეც, შემოდგომიდან ერთა ლიგაზე უნდა ვითამაშოთ, იქ კი ერთ-ერთი მეტოქე ლატვია გვყავს და მსგავსების საკითხში, ვითომ, რატომ არ უნდა გვარგოს ლიტვასთან და ესტონეთთან თამაშებმა?
ახლა პრანჭიაობის დრო არ გვაქვს, სწორედაც რომ მიწაზე უნდა დავეშვათ და ერთა ლიგისთვის საფუძვლიანად მოვემზადოთ.
ვლადიმირ ვაისს 23 მოთამაშე ჰყავს გამოძახებული და მათ შორის ყველაზე ახალგაზრდაა გიორგი ჩაკვეტაძე. რატომაც არა? 18 წლის ბიჭმა ბელგიური „გენტის“ ძირითადში დაიწყო თამაში, დღესდღეობით მისი დარი ტალანტი არ გვყავს და ვაისიც სანაკრებო დებიუტს უმზადებს.
თავიანთ კლუბებში პროგრესი აქვთ ოთარ კაკაბაძეს, ვაკო გვილიას, ლაშა დვალს, გიორგი პაპუნაშვილს, ვაკო ყაზაიშვილს, ბაჩანა არაბულს, გიორგი ქვილითაიას, ნიკა კაჭარავას… მოკლედ, ისეთ დღეში აღარ ვართ, ლეგიონერთა სათამაშო პრაქტიკის უქონლობას რომ ვუჩიოდით.
საქართველო VS სკანდინავიელები
ვნახოთ, როგორი იქნება 21-წლამდელთა ნაკრები გია ცეცაძის ხელში. ზედიზედ ორი თამაშია გორის „თენგიზ ბურჯანაძეზე“: 23 მარტს ფარერებთან და ოთხ დღეში – დანიასთან. ამათთან შარშან გასვლაზე შევრცხვით. დანიასთან 2:5 წავაგეთ და კუნძულელებთანაც 1:3.
ცეცაძეზე არჩევანის შეჩერება გასაგებია: „სამტრედიას“ ჩემპიონობა, ადრე 19-წლამდელების გაყვანა ევროჩემპიონატის ფინალურ ეტაპზე, კიდევ უფრო ადრე წარმატებული მუშაობა გორის „დილაში“…
ამ ფორმაციის 21-წლამდელებში გამორჩეულებად შეიძლება ჩავთვალოთ შვედურ „გიოტებორგში“ გადასული გიორგი ხარაიშვილი, პოლონური „არკას“ გარემარბი ლუკა ზარანდია, თბილისის „დინამოს“ კაპიტანი ოთარ კიტეიშვილი და დონეცკის „შახტარის“ დუბლების შემტევი გიორგი არაბიძე.
გამოკვეთილ თავდამსხმელად გიორგი კოხრეიძე, ვატო არველაძე ან ბექა მიქელთაძე მოგვევლინება.
17-წლამდელების სამი ნაბიჯი
ყურადღება პოლონეთისკენ! გიორგი ნემსაძის გაწვრთნილი 17-წლამდელები დღეს ევროპის ჩემპიონატის ელიტრაუნდს იწყებენ, ჯგუფში კი პოლონეთი, ირლანდია და მაკედონია ჰყავთ. ოთხიდან ორი საუკეთესო გავა ფინალურ ეტაპზე, სადაც 16 ნაკრები მოგროვდება.
დღეს საღამოს 20.30 ვიწყებთ პოლონეთთან დაპირისპირებით. ისე, ზეპირად, სწორედ მასპინძლები უნდა იყვნენ ჯგუფის ფავორიტები, თუმცა ეს ისეთი ასაკია, ვერ გაიგებ, ვინ რას შემოგთავაზებს.
24 მარტს ირლანდიას ვხვდებით, 27-ში კი მაკედონიით ვამთავრებთ.
ნემსაძის ნაკრებს ორი ბიჭი აკლია: მარჯვენაფლანგელი ცოტნე კაპანაძე „საბურთალოს“ დუბლებიდან და საყრდენი გიორგი შალიკაშვილი თბილისის „დინამოს“ აკადემიიდან.
ლიდერებად შეიძლება ხვიჩა კვარაცხელია, ზურაბ დავითაშვილი, გიორგი გულიაშვილი, შოთა ნონიკაშვილი, ირაკლი აზაროვი ჩავთვალოთ… თუმც ისიცაა, რომ ხელაღებით ვერ იტყვი, ხვალ-ზეგ უკეთ ვინ ითამაშებს – ვინ მოუმატებს, ვინ მოუკლებს. ერთი კი არის, შეტევა უკეთესი გვყავს, ვიდრე დაცვა.
ისე, ამ ასაკის ნაკრებების მთავარი შინაარსი სამომავლოდ ფეხბურთელების ძირითადი ნაკრებებისთვის მიწოდებაა, მაგრამ დღევანდელი შედეგი ხელს არაფერში უშლის. არავინ არ თქვას, რომ საქართველოში ვინმე შედეგს სწირავს.
