… როცა გიორგი ხარაიშვილი შვედურ „გიოტებორგში“ მიდიოდა, ბევრს ეგონა, რომ წლეულს „საბურთალოს“ ძალიან გაუჭირდებოდა. ამის მიზეზიც არსებობდა. გავიხსენოთ შარშანდელი სეზონი, როცა მათმა კაპიტანმა ტრავმა მიიღო, გუნდი ერთი მეორის მიყოლებით აგებდა მატჩებს. მაშინ საბურთალოელებს ერთდროულად კიდევ რამდენიმე მნიშვნელოვანი ფეხბურთელი დაუშავდათ და უსუსურ თამაშს ესეც განაპირობებდა, მაგრამ ხარაიშვილი „საბურთალოსთვის“ მაინც სხვა იყო. მარნეულელი ბიჭი, რომელის გაზრდაშიც საბურთალომ დიდი ამაგი დაიდო, ევროპის დაპყრობას შვედეთიდან იწყებს…
უხარაიშვილო „საბურთალომ“ კი ჩემპიონატი ჩინებულად დაიწყო. ეროვნული ლიგის სამი სასტარტო ტურიდან სამივე თამაში მოიგო, ყველაზე მეტი ბურთი გაიტანა და თამაშსაც საგაზაფხულო ეტაპის გათვალისწინებით, ერთობ სოლიდურს აჩვენებს. ახლა გამორჩეული არავინაა, მაგრამ გიორგი ჭიაბრიშვილმა გუნდურად აათამაშა ბიჭები. გორის „დილასთან“ გამარჯვებაც ამის დასტურია. გორელები რომ ხელწამოსაკრავები არ არიან, პირველ ტურშიც დამტკიცდა, როცა ჩემპიონი „ტორპედო“ სტუმრად დაამარცხეს.
კლუბის ოფიციალური ფეისბუქ-გვერდი კი გვამცნობს, რომ საბურთალოელებმა მოსამზადებელი პერიოდის ჩათვლით, ზედიზედ მე-15 შეხვედრა მოიგეს. შესანიშნავი შედგია. თუმცა, წინა მიმოხილვის არ იყოს, ამჯერადაც დავსძენთ. რომ ამ ყველაფრიდან შორსმიმავალი დასკვნების გაკეთება ჯერ ნაადრევია.
საჩემპიონო თამაში აჩვენა „ტორპედომ“ „ლოკომოტივთან.“ ქუთათურები ტურიდან ტურამდე უმატებენ და უკვე იმ გუნდს ემსგავსებიან შარშან რომ ბევრს მოსწონდა. მათმა 28 წლის შემტევმა, ლევან კუტალიამ დუბლი მიითვალა. ეს მეხუთე დუბლი გახლდათ წლევანდელ სეზონში. საერთოდ, ექს-შუქურელისთვის სეზონი წარმატებულად დაიწყო. შეგახსენებთ, რომ თებერვალში გამართულ სუპერთასის მატჩშიც „ჩიხურას“ გამარჯვების გოლი სწორედ მან გაუტანა.
აი, „ლოკომოტივს“ კი ცუდი დასაწყისი გამოუვიდა. სამივე სასტარტო მატჩი წააგო. ფოთელების მსგავსად ყველაზე მეტი გოლი გაუშვა და ამ ტურში კიდევ ერთი არასასიამოვნო „მიღწევითაც“ გამოირჩა – ვატო არველაძე წლევანდელ სეზონში პირველი ფეხბურთელი აღმოჩნდა, ვინც ავტოგოლი მიითვალა.
რკინიგზელთა დამრიგებელმა ლაშა ჭაღიაშვილმა შეგირდებს სათამაშო დისციპლინა ჯერ კიდევ წინა ტურში „დინამოსთან“ 1:4 წაგების შემდეგ დაუწუნა. თუმცა უკეთესობა არც ამჯერად ეტყობოდათ.
„დინამო“ ვახსენეთ და თბილისელებიც ჩვეულ კალაპოტში დგებიან. სტარტზე დებიუტანტ „რუსთავთან“ მარცხიც უკვე აღარავის ახსოვს. ამჯერად „დინამომ“ „სამტრედიას“ მოუგო. მთავრი კი ამ შეხვედრაში დინამოელთა რიგებში დებიუტანტ ნიკა ძალამიძის გამოჩენა გახლდათ. 26 წლის შემტევი ეროვნულ ლიგაში რვა წლის შემდეგ დაბრუნდა. მას საქართველოში ზუგდიდის „ბაიაში“ ეთამაშა. მერე იყო რუსული ცსკა, პოლონური „ვიძევი“ და “იაგელონია“, თურქული „რიზესფორი“, ისევ პოლონური „გურნიკი“ და რუმინული ბუქარესტის „იუვენტუსი“. ახალგაზრდულ ნაკრებში წარმატებული თამაში და ეროვნულ გუნდში დებიუტი. მერე თითქოს დაიკარგა. არადა, ისეთი ფეხბურთელია, რომლის გულისთვისაც დადის გულშემატკივარი სტადიონზე. არაორდინალური, ყოველ წუთს რომ შეიძლება რაღაც საინტერესო მოახდინოს. იმედია, საქართველოში „მეორე სუნთქვა“ გაეხსნება და კიდევ ბევრჯერ გაგვახარებს. ბედის ირონიით, ეს მისი 50-ე საიუბილეო მატჩი აღმოჩნდა საქართველოს ჩემპიონატის უმაღლეს ლიგაში.
ამ მატჩში კიდევ ერთი მნიშვნელოვანი ამბავი მოხდა: პირველი გოლი ბუდუ ზივზივაძემ გაიტანა და აღნიშვნისას წარწერიანი თეთრი მაისურა აღმართა. მაისურაზე „#ოთოსთვის“ ეწერა. როგორც გაირკვა, ოთო თბილისის „დინამოს“ ქომაგის ნიკოლოზ ხარაძეს შვილია, რომელიც საავადმყოფოში რთულ მდგომარეობაში იმყოფება და ამ სახით თბილისური კლუბის ფეხბურთელებმა თავისი მხარდაჭერა გამოხატეს!
პირველი ქულა მოიპოვა ფოთის „კოლხეთმა“, რომელიც „სიონის“ წინააღმდეგ გადაყენებული რუსი მწვრთნელის, კონსტატინ გალკინის თანაშემწე ნუგზარ თვარაძემ ათამაშა, ბოლო წუთებზე ფოთელები ცოტა ზუსტნი რომ ყოფილიყვნენ, სამ ქულასაც ჩაიწერდენენ დავთარში.
ისევ წააგო მეორე რუსი დამრიგებლის, ვლადიმირ გაზაევის „რუსთავმა.“
და კიდევ, მესამე ტურში სულ 11 გოლი გავიდა, რაც წლევანდელ სეზონში ყველაზე დაბალი მაჩვენებელია. (პირველ ტურში – 22, მეორეში – 14 ). იმედია, ეს მხოლოდ ციფრებია და არა დაღმავალი ტენდენცია…
III ტური: დინამო 3:1 სამტრედია, ტორპედო 4:0 ლოკომოტივი, ჩიხურა 1:0 რუსთავი, საბურთალო 2:0 დილა, სიონი 0-0 კოლხეთი
საუკეთესო მეგოლე: გიორგი გაბედავა (ჩიხურა) – 4
სატურნირო ვითარება 3 ტურის შემდეგ:
