ღმერთის ხელიან კაცსაც კი შეიძლება უარი სტკიცონ აშშ-ს ვიზაზე და ჰა, ინებეთ – დიეგო მარადონამ შტატების ვიზა ვერ მიიღო. მარტში სასამართლოს უნდა დასწრებოდა მაიამიში, სადაც მისი ცოლყოფილის კლაუდია ვილაფანეს საქმე გაირჩევა. საქმე კი მარადონას ფულს ეხება, რომელიც კლაუდიამ ქმრის დაუკითხავად დაამღერა ჯერ კიდევ ოფიციალურ გაყრამდე.
ვიზაზე განაცხადი უკვე შეტანილი ჰქონდა, როცა ტელეკომპანია „ტელესურთან” ინტერვიუში დიეგომ დონალდ ტრამპს „ჩიროლიტა“ უწოდა. „ჩიროლიტა“ ტელე შოუს თოჯინაა და არგენტინაში სალანძღავ სიტყვადაა ქცეული. ეგებ ამის გამოც არ მისცეს ვიზა. მარადონა მის ადვოკატ მატიას მორალს ინტერვიუმდე გაუფრთხილებია, ამერიკაზე და დონალდ ტრამპზე რამე ცუდი არ წამოგცდესო. ფიდელ კასტროს ძმობილი აბა ამ შანსს ხელიდან როგორ გაუშვებდა და ტრამპი საჯაროდ „მიაჩიროლიტა“.
ადრე ჯორჯ ბუშზე თქვა, ნაგავიაო, მერე კი ვენესუელაში ტელე შოუში ბრძანა, მთელი სულით და გულით მძულს ყველაფერი ამერიკულიო. 1994 წლის შემდეგ აშშ-ში არ ყოფილა. იმ წელს კი, მსოფლიო ჩემპიონატზე, სუნთქვის შემკვრელად მოთამაშე არგენტინის ნაკრებს მარადონა დოპინგის გამო ჩამოაშორეს.
