ჩვენთან არც დაწყებულა და ევროპაში კი მორჩა დღესასწაულები. იქ ორკვირიანი გადაბმული ამბები არ იციან, ახალი წლის შემოსვლას მხოლოდ ფეიერვერკით იგებენ, ხოლო 1 იანვარს და მომიჯნავე დღეებში ჩვეულებრივად მიდი-მოდიან საქმეებზე, ზოგიერთები კი მისრიალ-მოსრიალობენ კიდეც.
30 და 31 დეკემბერს, 1, 3, 4, 6 და 7 იანვარს ბარის თხილამურობის (Cross-country skiing) მსოფლიო თასზე მნიშვნელოვანი ეტაპებია, მაგრამ თქვენი მონა-მორჩილი ნათელი გონებით მათ მიმოხილვას ვერ დაგპირდებათ, ამიტომ 2017 წლის ეტაპების მოკლე აღწერა აქვე გვსურს შემოგთავაზოთ.
იოჰანეს ჰიოსფლოტ კლებო – ეს სახელი დასამახსოვრებელია. 21 წლის ნორვეგიელი ყმაწვილი, ძველმოდური გამოთქმა რომ ვიხმაროთ, მეტეორივით შემოიჭრა თხილამურობის ატმოსფეროში. იუნიორთა მსოფლიო პირველობების სამგზის მოგების შემდეგ კლებომ მოზრდილებსაც შეუტია და 2016-17 წლების მსოფლიო თასზე მე-4 ადგილზე გასვლით ზვავი დაძრა, თუმც შარშანდელ სეზონში პოდიუმზე სულ ორგზის იდგა და ვინ იფიქრებდა, ზაფხულის არდადეგებიდან ნორვეგიელი ასე მოზვერივით ჯანზე მოსული თუ დაბრუნდებოდა.
წელს ზემოთ ნახსენები ზვავი ძალას გეომეტრიული პროგრესიით იკრებს. როცა კლებომ 24 ნოემბერს, ფინურ კუუსამოში მსოფლიო თასის პირველი რბოლა (კლასიკურ სპრინტში) დიდი უპირატესობით მოიგო, თხილამურობაში ჭიპმოჭრილი პრიზიორები მასთან მართლაც გულითადად მისრიალდნენ და მხარზე მამაშვილურად უთათუნებდნენ ხელებს. მილოცვათა გულწრფელობის კოეფიციენტი, ვფიქრობთ, ნოლზე დავიდოდა მომდევნო რვა რბოლის შემდეგ, რომელთაგან კლებომ ექვსი მოიგო და საერთო ჩათვლას ისეთი უპირატესობით ლიდერობს, დიდი ბროლის გლობუსი, გეგონებათ, უკვე ხელთ უპყრიაო. დააკვირდით ნორვეგიელის არანორმალურ გარღვევებს სპრინტებზე ლილეჰამერსა და დავოსში და დასკვნები თავად გამოიტანეთ. გარდა სპრინტისა, სკანდინავიელი ვუნდერკინდი დომინირებს ყველა კლასიკურ რბოლაში (თუ გამოდევნებით, თუ საერთო სტარტით) და მხოლოდ თავისუფალი სტილის ეტაპები ვერ არის ჯერჯერობით მისი კოზირი – აქ ფრანგი მორის მანიფიკა მძლავრობს. მაგრამ ფრანგის საუკეთესო წლები ჩავლილია და თუ მომავალში კლებოს აღმასვლა ვინმემ უნდა შეაფერხოს, ისევ მისმა კბილა ალექსანდრ ბოლშუნოვმა. რუსი ყმაწვილი წელს კი ნორვეგიელის ჩრდილშია, მაგრამ პოდიუმზე მუდმივად დგას, ამიტომ შოუ მთელი სეზონის მანძილზე გაგრძელდება.
მსოფლიო თასის მიმდინარე შედეგები ასე გამოიყურება:
საერთო ჩათვლა: 1. კლებო (ნორ) – 752 ქულა; 2. მანიფიკა (საფ) – 428; 3. ბოლშუნოვი (რუს) – 402
რბოლა შორ მანძილებზე: 1. მანიფიკა (საფ) – 357; 2. კლებო (ნორ) – 302; 3. კრიუგერი (ნორ) – 290
სპრინტი: 1. კლებო (ნორ) – 250ქულა; ბოლშუნოვი (რუს) – 150; პელეგრინო (იტა) – 129
ქალთა თხილამურობაც, ტრადიციულად, სკანდინავიელთა საჯირითო სარბიელს წარმოადგენს. აქ ჯერჯერობით შემდეგი კანონზომიერება ჩანს: ნომინაციათა უმრავლესობას შვედი დიაცები, პირველ რიგში შარლოტ კალა (სპრინტში კი მომხიბლავი სტინა ნილსონი) თამადობენ, დანარჩენი საპრიზო ადგილები კი ცხრილებში ნორვეგიული ალმებითაა აჭრელებული. და კიდევ: ბარის თხილამურობაში ცალკე პრიზი ერგებათ 23-წლამდელებს, სადაც ამჟამად მთელი პოდიუმი რუსი მანდილოსნებითაა შევსებული (ნეპრიაევა, ბელოკუროვა, სედოვა), რაც მომავლის ამბავში საყურადღებოა. ვაჟთაგან განსხვავებით, ქალთა ქულებში დიდი სიმჭიდროვეა და ბროლის გლობუსების ბედიც ალბათ ბოლო ეტაპებზე გაირკვევა.
