ვლადიმირ ვაისის საქართველოს ნაკრებმა მეოთხე მატჩი მოიგო. ესეც ამხანაგური, თუმცა, მთავარია მოიგო და ქომაგებს განწყობა გამოუკეთა. განწყობა გამოიკეთეს თავად მწვრთნელმა და ფეხბურთელებმაც, რაც სამომავლოდ ფრიად მნიშვნელოვანია, აბა, სულ წაგებული ჩვენი მტერი იყოს…
საქართველომ კვიპროსს მოუგო და ეს ამ გუნდთან ისტორიაში პირველად მოახერხა; საქართველომ მოიგო გორში და ესეც კარგია – თბილისს გარეთ გაიმარჯვა და ადგილობრივ ქომაგებს დაენახა; საქართველომ თავისი კალიბრის გუნდს მოუგო, ეს კი მანიშნებელია, რომ ერთა ლიგაში ჩვენი მეტოქეების შინ დამარცხება შეგვიძლია; ცუდია ის, რომ საქმე აქამდე მივიდა და ევროპის მაჩანჩალების დამარცხებაზე უკვე ლამის ოცნება დავიწყოთ…
გორში სახეშეცვლილი ნაკრები ვიხილეთ, სახეშეცვლილი და არა არსობრივად შეცვლილი თამაში. ვაისმა რამდენიმე ახალგაზრდა ათამაშა და მათაც მწვრთნელისთვის თავის მოსაწონებლად თავი არ დაზოგეს. სავარაუდოდ, მწვრთნელს მათ შესახებ შთაბეჭდილება შეექმნა.
ჩვენებმა ამჯერადაც ერთი ტაიმი მეორეზე უკეთ ჩაატარეს. საქართველო შესვენებამდე უკეთესად გამოიყურებოდა, აკი გოლიც ამ დროს გაიტანა. ჯაბა კანკავამ სტუმართა მეკარისა და მცველის უხეში შეცდომით ისარგებლა, ბურთი გიორგი ქვილითაიას მიუგორა და მანაც ოსტატური დარტყმით გაიტანა…
მასპინძლებს მეორე ტაიმის მეორე ნახევარიც კარგი გამოუვიდათ, თუმცა გადამწყვეტ ფაზაში თავდამსხმელებმა შესცოდეს და გუნდი მხოლოდ 1:0-ს დააჯერეს, არადა, ალალად, მეტის გატანაც შეეძლოთ… რაც მთავარია, საქართველომ მოიგო და ვიმედოვნებთ, ქუთაისური მატჩის შემდეგაც იგივეს ვიტყვით… ქუთაისში ჩვენები 13 ნოემბერს ბელარუსს დაუხვდებიან…
შეგახსენებთ, ბოლოს საქართველოს ნაკრებმა 7 ივნისს სენ კიწისა და ნევისი ნაკრები დაამარცხა, იქამდე კი 28 მარტს ლატვიას მოუგო.
ამხანაგური მატჩი
10 ნოემბერი. გორი. 17:00. “თენგიზ ბურჯანაძე”. 4 500 მაყურებელი
საქართველო 1:0 კვიპროსი
1:0 ქვილითაია (24)
საქართველო: ლორია, კაკაბაძე, კაშია, ხოჭოლავა, ნავალოვსკი (გრიგალავა 83), კანკავა, კვეკვესკირი (აბურჯანია 83), ყაზაიშვილი (ს. ლობჟანიძე 67), პაპუნაშვილი (გვილია 74), მერებაშვილი (სიხარულიძე 83), ქვილითაია (კაჭარავა 83)
სათადარიგონი: მაკარიძე, კვასხვაძე; გეგეჭკორი, დვალი, შერგელაშვილი, ჯიღაური
მწვრთნელი: ვლადიმირ ვაისი
კვიპროსი: გეორგალიდესი, არტიმატასი (ეკონომიდესი 82), ხრისტოფი (მიტიდისი 73), დემეტრიუ, ეფრემი (კასტანოსი 65), კირიაკუ (ავრაამი 73), ლაბანი (ფილატკუ 65), ლაიფისი, მარგაკა (ვასილიუ 82), მერტისი, სოტირიუ
სათადარიგონი: ნეოფიტოსი; ანტონიადესი, ჰასამო, კატელარისი, პაპაფოტისი, რუსიასი, სტილიანუ, ურკო
მწვრთნელი: რან ბენ შიმონი
გაფრთხილება: ლაბანი, კაკაბაძე, მერკისი, მარგაკა
მსაჯი: სურენ ბალიანი (სომხეთი)
