რაფაელ ნადალმა პარიზის მასტერსის მეორე წრეში სამხრეთ კორეელ ჩან ჰიანს სძლია 7:5 6:3 და ამ გამარჯვებით თავის ბრწყინვალე მიღწევათა ჩამონათვალს რამდენიმე ახალი რეკორდი შემატა.
31 წლის ესპანელმა, ვინაც რეიტინგის სათავეში მიმდინარე წლის 21 აგვისტოს ბრიტანელ ენდი მარის ჩაენაცვლა, გახდა უხუცესი იმ დიად მეჩოგნეთა შორის, 1973 წლიდან – ანუ სარეიტინგო ქულათა კომპიუტერული დათვლის შემოღებიდან – დღემდე სეზონი ამქრის პირველ საფეხურზე რომ გაუსრულებიათ.
რეიტინგის თხემზე ახალ წელს რაფა უკვე მეოთხედ იზეიმებს 2008, 2010 და 2013 წლების შემდეგ. ამ მაჩვენებლით ის გაუთანაბრდა ივან ლენდლს, ჯონ მაკინროისა და ნოვაკ ჯოკოვიჩს და ახლა მხოლოდ პიტ სამპრასს (6), ჯიმი კონორსსა და როჯერ ფედერერს (5) ჩამორჩება.
მაგრამ რაფა პირველია, ვინც: ა) უკვე მესამედ შეძლო რეიტინგის მწვერვალზე დაბრუნება მას შემდეგ, რაც იქიდან პირველად დაქვეითდა, ბ) ყოველ ჯერზე ეს, სულ მცირე, ერთწლიანი პაუზის შემდეგ გააკეთა, გ) გააკეთა ეს 4-წლიანი პაუზის შემდეგ და, რაც მთავარია – დ) ოცდაათ წელს გადაცილებულმა. სარეკორდოა ის ცხრა წელიც, რომელიც მის მიერ სეზონის პირველ ადგილზე პირველად დასრულებიდან (ანუ 2008 წლიდან) მეოთხედ დასრულებამდე (ანუ წლევანდლამდე) განვლო.
რაფას ბეღელში ახლა 66 ჯილდოა დაუნჯებული, აქედან ექვსი მან მიმდინარე სეზონში მოიხვეჭა, რომლის განმავლობაშიც ისტორიული მე-10 გამარჯვება იზეიმა ერთაბაშად სამ ტურნირზე – „როლან გაროსზე“, მონტე-კარლოს მასტერსა და ბარსელონაში, მეხუთედ იმარჯვა მადრიდის მასტერსზე, მესამედ – აშშ-ის ღია პირველობაზე და მეორედ – პეკინში. გარდა ამისა მან წლეულს კიდევ ოთხ ფინალს უწია – ავსტრალიის ღია პირველობაზე, აკაპულკოში, მაიამისა და შანხაის მასტერსებზე. გადამწყვეტი მატჩი მექსიკაში მან ამერიკელ სემ კუერისთან დათმო, დანარჩენ სამ შემთხვევაში კი – როჯერ ფედერერთან.
2016 წლის დამლევს რაფა რეიტინგში მე-9 საფეხურზე იდგა, რაც იმას ნიშნავს, რომ წლეულს მან შეასრულა ყველაზე დიდი ერთწლიანი ნახტომი პირველ ადგილამდე ამერიკელი ენდი როდიკის შემდეგ, რომელსაც ერთი წლით ადრე მანამ, სანამ 2003 წლის სეზონს რეიტინგის მწვერვალზე დაამთავრებდა, მე-10 პოზიცია ეკავა.
ნადალმა, ვინაც 2008 წლის 18 აგვისტოს, როცა პირველად გახდა ამქრის პირველადგილოსანი, 22 წლის იყო, რეიტინგის სათავეში ჯამში 152 კვირა გაატარა: 46 კვირა 2008 წლის 18 აგვისტოდან 2009 წლის 5 ივლისამდე, 56 – 2010 წლის 7 ივნისიდან 2011 წლის 3 ივლისამდე, 39 – 2013 წლის 7 ოქტომბრიდან 2014 წლის 6 ივლისამდე და 11 კვირაც 2017 წლის 21 აგვისტოდან დღემდე. ამ მაჩვენებლით ის მეშვიდეა ფედერერის (302), სამპრასის (286), ლენდლის (270), კონორსის (268), ჯოკოვიჩისა (223) და მაკინროის (170) შემდეგ.
აქვე წარმოგიდგენთ იმ მეჩოგნეთა სრულ სიას, რომლებიც სეზონის დასასრულს მსოფლიო რეიტინგის პირველ ადგილზე შეხვედრიან.
2017 რაფაელ ნადალი (ესპანეთი)
2016 ენდი მარი (დიდი ბრიტანეთი)
2015 ნოვაკ ჯოკოვიჩი (სერბეთი)
2014 ნოვაკ ჯოკოვიჩი (სერბეთი)
2013 რაფაელ ნადალი (ესპანეთი)
2012 ნოვაკ ჯოკოვიჩი (სერბეთი)
2011 ნოვაკ ჯოკოვიჩი (სერბეთი)
2010 რაფაელ ნადალი (ესპანეთი)
2009 როჯერ ფედერერი (შვეიცარია)
2008 რაფაელ ნადალი (ესპანეთი)
2007 როჯერ ფედერერი (შვეიცარია)
2006 როჯერ ფედერერი (შვეიცარია)
2005 როჯერ ფედერერი (შვეიცარია)
2004 როჯერ ფედერერი (შვეიცარია)
2003 ენდი როდიკი (აშშ)
2002 ლეიტონ ჰიუიტი (ავსტრალია)
2001 ლეიტონ ჰიუიტი (ავსტრალია)
2000 გუსტავო კუერტენი (ბრაზილია)
1999 ანდრე აგასი (აშშ)
1998 პიტ სამპრასი (აშშ)
1997 პიტ სამპრასი (აშშ)
1996 პიტ სამპრასი (აშშ)
1995 პიტ სამპრასი (აშშ)
1994 პიტ სამპრასი (აშშ)
1993 პიტ სამპრასი (აშშ)
1992 ჯიმ კურიე (აშშ)
1991 შტეფან ედბერგი (შვედეთი)
1990 შტეფან ედბერგი (შვედეთი)
1989 ივან ლენდლი (ჩეხეთი)
1988 მატს ვილანდერი (შვედეთი)
1987 ივან ლენდლი (ჩეხეთი)
1986 ივან ლენდლი (ჩეხეთი)
1985 ივან ლენდლი (ჩეხეთი)
1984 ჯონ მაკინროი (აშშ)
1983 ჯონ მაკინროი (აშშ)
1982 ჯონ მაკინროი (აშშ)
1981 ჯონ მაკინროი (აშშ)
1980 ბიორნ ბიორგი (შვედეთი)
1979 ბიორნ ბიორგი (შვედეთი)
1978 ჯიმი კონორსი (აშშ)
1977 ჯიმი კონორსი (აშშ)
1976 ჯიმი კონორსი (აშშ)
1975 ჯიმი კონორსი (აშშ)
1974 ჯიმი კონორსი (აშშ)
1973 ილიე ნასტასე (რუმინეთი)
