ქარიმ ბენზემამ ფრანგულ ჟურნალ Les Inrockuptibles-ს მისცა ინტერვიუ. ეს გახლავთ 1986 წელს დაფუძნებული გამოცემა, რომელიც თავიდან როკზე წერდა, მაგრამ თანდათან კულტურის სფერო მთლიანად მოიცვა. ახლა, როგორც ხედავთ, ფეხბურთითაც დაინტერესებულა.
ინტერვიუ ვრცელია. სხვა თემებთან ერთად, ის ყოფილი ინგლისელი თავდამსხმელის, დღეს ენამწარეობით ცნობილი ტელეწამყვანის, გარი ლინეკერის ბოლო დროს გახმაურებულ ხუმრობასაც ეხება. შეგახსენებთ: თავიდან ლინეკერმა ბენზემაზე თქვა, ისეთი კარგი არ არის, როგორც აქებენო და “ტოტენჰემ ჰოთსპურის” ფორვარდი ჰარი კეინი მასზე მაღლა დააყენა. “რეალის” მწვრთნელმა, ზინედინ ზიდანმა თავისი ფეხბურთელი დაიცვა. ამას მოჰყვა პრემიერლიგის შეხვედრა რომელშიც კეინმა “ლივერპულს” ორი გოლი გაუტანა. ლინეკერმა ცხადია დრო იხელთა და ზიდანს დასცინა — კიდევ კარგი საუკეთესო თავდამსხმელი ბენზემა ჰგონია, თორემ “ტოტენჰემს” კეინს წაართმევდაო. ამაზე ზიდანს აღარაფერი უპასუხია, მაგრამ ესპანურმა გაზეთმა “მარკამ” ლინეკერს “ბარსელონაში” თამაშის დროინდელი სტატისტიკა გაუხსენა და ჰკითხა, ლა ლიგაში თამაშის დროს თავად როგორი ფეხბურთელი იყავიო. მეც ზედმეტად მაქებდნენო, პატიოსნად უპასუხა ლინეკერმა.
Les Inrockuptibles-ისთვის მიცემულ ინტერვიუში ბენზემამ, რომელიც ბოლო დროს მართლა არ არის კარგ ფორმაში, თქვა: “ვწუხვარ, რომ არიან ყოფილი ფეხბურთელები, რომლებიც ჟურნალისტები გახდნენ და მხოლოდ სიძულვილს ამჟღავნებენ. კარიერაში, მათაც ჰქონიათ ცუდი პერიოდები, მაგრამ სოლიდარობას არ გიცხადებენ”.
შემდეგ, ბენზემამ თქვა, რომ ძალიან უნდა გაისად მსოფლიოს ჩემპიონატზე თამაში და იმედოვნებს, რომ საფრანგეთის ნაკრების ხელმძღვანელები რუსეთში წაიყვანენ. მან, აგრეთვე გაიხსენა ბავშვობა, ქუჩაში ბურთაობის ხანა, როდესაც კარის მაგივრობას ორი ხე წევდა, სახიფათო უბანი და მამა, რომელმაც გზიდან გადახვევის საშუალება არ მისცა.
“ჩემი ოჯახის წევრებიდან მამა დღესაც ყველაზე მეტად მიდგას გვერდში. ის ხშირად ჩამოდის მადრიდში და ვარჯიშებსაც კი ესწრება” — თქვა ბენზემამ.
