სათაურს ესპანურ გაზეთ “მარკას” დავესესხეთ. კატალონიაზეა ლაპარაკი. კიდევ მარიდის “რეალზე”, რომელსაც ხვალ კატალონიაში, ჟირონაში აქვს თამაში. “რეალი” მესამეზეა, “ჟირონა” მეთხუთმეტეზე, ოღონდ ესპანეთის ჩემპიონატში. ქვეყანაში კი დიდი გაუგებრობაა: კატალონიის პარლამენტმა პარასკევს შუადღისას რესპუბლიკა გამოაცხადა. პასუხად, მადრიდში, ესპანეთის ხელისუფლებამ 21 დეკემბერს ახალი საპარლამენტო არჩევნები დაუნიშნა. ცხადია, როგორც ავტონომიას. უკან დახევას არც ერთი მხარე არ აპირებს. დანარჩენი მორევაზეა, ოღონდ, ჯერჯერობით, კატალონიის დამოუკიდებლობას ქვეყნის გარეთ მხარდამჭერები არ ჰყვავს. ამბობენ, ოკუპირებული სამხრეთ ოსეთის საგარეო საქმეთა სამინისტრომ ბარსელონაში თავისი წარმომადგენლობა გახსნაო, რაც მთელ ამ ისტორიაში რუსეთის შესაძლო კვალზე მიგვანიშნებს. და თუ კატალონია ესპანეთს მართლა ჩამოშორდება, დღევანდელი გადასახედიდან ავტომატურად აღმოჩნდება ევროკავშირის, ევროს ზონის, შენგენის ხელშეკრულების და სხვა აწყობილი სისტემების მიღმა.
ჩვენი ინტერესის სფერო კი სპორტია. ვის უნდა, ამხელა “ბარსელონა” კატალონიის დამოუკიდებელ ჩემპიონატში გადავიდეს და ყოველ ტურში “ჟირონას” ან რომელიმე სხვა პატარა ქალაქის გუნდს ეთამაშოს. “ესპანიოლი”? ის კატალონიაში მცხოვრები ესპანელების გუნდია. სეპარატისტული ძალებისა და სტრუქტურების წარმომადგენლებმა ჟურნალისტებს უთხრეს, რომ სპორტს არ შეეხებიან და “ლა ლიგას” თამაშებს საფრთხე არ დაემუქრება, ოღონდ, ჯერჯერობით ეს კულუარული ლაპარაკებია.
საკუთრივ “ბარსელონას” კატალონიის რესპუბლიკად გამოცხადებაზე ოფიციალური განცხადება ჯერ არ გაუკეთებია. ამბობენ, არც გააკეთებსო. დღეს “ბლაუგრანა” ბილბაოში “ატლეტიკს” ხვდება. ითქვა, რომ “ბარსას” ნებისმიერი წარმომადგენლის პოლიტიკური განცხადება იქნება მისი პირადი პოზიცია და სხვა არაფერი. ასე მაგალითად, მწვრთნელმა ერნესტო ვალვერდემ, რომელიც ბილბაოში ფაქტობრივად შინ არის ჩასული, ბასკ ჟურნალისტებს უარი ვერ უთხრა და კატალონიის დამოუკიდებლობის თემას მსუბუქად შეეხო — ისევე, როგორც ყველა მეც ვცდილობ ერთი ცნობაც არ გამეპაროსო; დარწმუნებით ვერაფერს ვიტყვი, რადგან სიტუაცია ყოველ ხუთ წუთში ერთხელ იცვლებაო; ჯობია, ფეხბურთზე ვიფიქრო, რადგან ჩემი საქმე ეს არისო…
და “რეალის” ჟირონაში ჩასვლა ხომ არ არის სახიფათო? მადრიდელთა მწვრთნელმა, ზინედინ ზიდანმა თქვა, პოლიტიკა არ მაინტერესებს, ჩავალთ, ჩვეულებრივად ვითამაშებთ და დავბრუნდებითო. ისე, ხვალ, “ესტადიო მონტილივიზე” თბილისის დროით 19 საათსა და 15 წუთზე დანიშნულ შეხვედრას მართლა ერთგვარი გამოცდის ელფერი დასდევს.
